Կանխվել է պայմանագրային աշխատողի միջոցով թմրանյութի ներթափանցումը հիմնարկ

ՀՀ ԱՆ քրեակատարողական ծառայության կենտրոնական մարմնի օպերատիվ վարչության «Արմավիր» տարածքային բաժնի ծառայողները տեղեկություններ էին ստացել այն մասին, որ հիմնարկի տնտեսական մասի պայմանագրային աշխատող Ա․ Հ․-ն փորձելու է հիմնարկ ներս մտցնել թմրամիջոց։

Իրացնելով ստացված տեղեկությունները՝ նշված տարածքային բաժնի ծառայողները հիմնարկի անվտանգության ապահովման բաժնի ծառայողների հետ միասին հունիսի 27-ին՝ ժամը 09։15-ի սահմաններում, զննության են ենթարկել Ա․Հ․-ի մոտ առկա էլեկտրական շաղափիչը։

Արդյունքում` շաղափիչի միջից ծառայողները հայտնաբերել են 2 փաթեթ՝ մեթամֆետամին տեսակի թմրամիջոցին նմանվող, սպիտակ, բյուրեղանման, ընդհանուր 3,15 գրամ քաշով զանգվածներով։

Ա․Հ․-ն ձերբակալվել է օպերատիվ ծառայողների կողմից և հայտնաբերված զանգվածների հետ միասին ներկայացվել ՀՀ ՔԿ Արմավիրի մարզային քննչական վարչության Վաղարշապատի քննչական բաժին։

Ծանուցում․ Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով։