Գերմանացի հիվանդը Լաչինի միջանցքի փակվելու պատճառով մնացել է առանց դոնորի

Ցողունային բջիջների փոխպատվաստման խիստ կարիք ունեցող Գերմանացի հիվանդը, Ադրբեջանի կողմից Արցախի շրջափակման պատճառով, կարող է կորցնել համատեղելի դոնորից փոխպատվաստում ստանալու հնարավորությունը, հայտարարել է Ոսկրածուծի դոնորների հայկական ռեեստրը (ABMDR):

Հունվարի 10-ին Գերմանական ոսկրածուծի դոնորների ռեեստրը «Ոսկրածուծի Դոնորների Համաշխարհային Բանկում» գտել է հայկական ռեեստրում կամավորագրված համատեղելի դոնոր, որը Արցախից է և այս պահին գտնվում է շրջափակման մեջ։

Համաձայն ընդունված ընթացակարգի, մինչ փոխպատվաստման իրականացումը Հայկական ռեեստրը պետք է իր գերմանական գործընկերոջը ուղարկի դոնորի արյան նմուշները՝ վերջնական համատեղելիությունը պարզելու նպատակով ։

Այս մարդասիրական գործընթացը փակուղի է մտել Ադրբեջանի կողմից Լաչինի միջանցքի արգելափակման պատճառով, որը այս պահին Արցախը Հայաստանին կապող միակ ճանապարհն է։ «Մեր կամավոր դոնորը Արցախում պատրաստակամություն է հայտնել տրամադրել արյան նմուշներ, հետագայում նաև նվիրաբերել իր ցողունային բջիջները՝ օգնելու փրկել Գերմանիայում ծանր հիվանդությամբ տառապող հիվանդի կյանքը», - ասաց Ռեեստրի գործադիր տնօրեն դոկտոր Սևակ Ավագյանը: «Խնդիրն այն է, որ Ադրբեջանի կողմից արդեն հինգ շաբաթ ձգվող Արցախի շրջափակման պատճառով մեր դոնորը ֆիզիկապես անհասանելի է մեզ համար։ Այս պահին անհնար է նրանից արյան նմուշառում կատարել և հետագայում նա չի կարողանա գալ Երևան՝ ռեեստրում իր ցողունային բջիջների նվիրաբերման համար»:

«Սա իսկապես շատ ողբերգական իրավիճակ է, որը մեկ անգամ ևս փաստում է, որ Ադրբեջանի շրջափակումը խոչընդոտում է այնպիսի միջազգային մարդասիրական ծրագրերին, ինչպիսիք են ցողունային բջիջների փոխպատվաստումը», - նշում է ՈԴՀ Ռեեստրի նախագահ դոկտոր Ֆրիդա Ջորդանը և շարունակում, « Մենք այստեղ ենք անելու ամեն հնարավորը փրկելու այն հիվանդներին, ովքեր մեր կարիքն ունեն, սակայն այս պահին մենք անարդար կերպով զրկված ենք մեր մարդասիրական առաքելությունը իրականացնելու հնարավորությունից։ Անհնար է գերագնահատել այն իրավիճակը, երբ հիվանդը պայքարում է կյանքի համար՝ սպասելով փոխպատվաստմանը և յուրաքանչյուր րոպեն խիստ կարևոր է»:

Բժիշկ Ջորդանը հավելեց, որ Ռեեստրը դիմել է Միջազգային Կարմիր Խաչին՝ արցախցի դոնորից արյան նմուշները փոխանցմանը օժանդակելու համար:

Ոսկրածուծի դոնորների հայկական ռեեստրը հիմնադրվել է 1999 թվականին և գրանցվել է որպես շահույթ չհետապնդող բարեգործական կազմակերպություն:

Հիմնադրամի նպատակն է հիվանդի համար գտնել ոսկրածուծի/ցողունային բջիջների համապատասխան դոնոր, կազմակերպել դոնորների հավաքագրում համայն հայության շրջանում: Մինչ օրս ռեեստրում կամավորագրվել է ավելի քան 33.500 դոնոր, համընկնող ավելի քան 9000 պոտենցիալ դոնոր է հայտնաբերվել, որոնցից 39-ը նվիրաբերել են իրենց արյան ցողունային բջիջները:

«Ոսկրածուծի դոնորների հայկական ռեեստր» բարեգործական հիմնադրամ