Հանձնաժողովը դրական եզրակացություն է տվել բարձր տեխնոլոգիաների ոլորտում առաջանցիկ զարգացում ապահովելուն ուղղված օրենսդրական նախաձեռնությանը (տեսանյութ)
Աջակցիր «Ա1+»-ին«Բարձր տեխնոլոգիաների ոլորտի պետական աջակցության մասին» եւ «ՀՀ հարկային օրենսգրքում փոփոխություններ եւ լրացումներ կատարելու մասին» օրենքների նախագծերի փաթեթը երկրորդ ընթերցմամբ քննարկվել է ՀՀ ԱԺ տնտեսական հարցերի մշտական հանձնաժողովի` դեկտեմբերի 2-ի արտահերթ նիստում: Նախագծերի փաթեթի ընդունման նպատակը բարձր տեխնոլոգիական ոլորտի, ինչպես նաեւ գիտահետազոտական աշխատանքների համար պետական աջակցության գործիքակազմի եւ հարկային արտոնությունների շրջանակի վերանայումն է` նպատակ ունենալով ստեղծել ավելի բարենպաստ պայմաններ նշյալ ոլորտներում առաջանցիկ զարգացում ապահովելու համար, գրում է ԱԺ-ից։
ՀՀ բարձր տեխնոլոգիական արդյունաբերության նախարար Մխիթար Հայրապետյանի ներկայացմամբ առաջինից երկրորդ ընթերցում ընկած ժամանակահատվածում` մի շարք քննարկումներից հետո այն լրամշակվել է. հաշվի են առնվել ինչպես ԱԺ պատգամավորների, այնպես էլ` տեխնոլոգիական համայնքի տարբեր միությունների ու ընկերությունների կողմից ստացված առաջարկություններ: Մասնավորապես, «Բարձր տեխնոլոգիաների ոլորտի պետական աջակցության մասին» օրենքի նախագծում Կառավարությունն առաջարկում է «աշխատանքային միգրանտներ եւ նոր աշխատողների ներգրավման համար եռամսյակային կտրվածքով տրամադրել աշխատավարձի եւ դրան հավասարեցված այլ վճարումների կամ քաղաքացիական-իրավական պայմանագրով աշխատանքի վարձատրության գծով հաշվարկված եկամտահարկի գումարի 60 տոկոսի չափով աջակցություն»: Նախարարի պարզաբանմամբ հետայսու համահարթ մոտեցում կցուցաբերվի` սահմանելով համահարթ կարգավորում բոլոր ընկերությունների համար:
Հաջորդ փոփոխությամբ տնտեսավարող սուբյեկտներին առաջարկվում է մասնագիտական աշխատանք կատարող կադրերի պատրաստման եւ վերապատրաստման դեպքում եռամսյակային կտրվածքով տրամադրել աշխատավարձի եւ դրան հավասարեցված այլ վճարումների կամ քաղաքացիական-իրավական պայմանագրով աշխատանքի վարձատրության գծով հաշվարկված եկամտահարկի գումարի 50 տոկոսի չափով աջակցություն: Նախագծից առաջարկվում է հանել վերապատրաստման նպատակով տնտեսավարող սուբյեկտի կողմից կատարված գործուղման ծախսերի փոխհատուցման կարգավորումները:
ՀՀ ԱԺ նախագահի տեղակալ Հակոբ Արշակյանը շնորհակալություն է հայտնել գործադրված ջանքերի, կարճ ժամանակահատվածում նման ծավալուն օրինագիծ մշակելու, ներկայացնելու, ինչպես նաեւ շահագրգիռ քննարկման համար: Նա խոսել է նաեւ օրենսդրական փաթեթում իր կողմից ներկայացված առաջարկությունների մասին` ընդգծելով դրանց անհրաժեշտությունն ու կարեւորությունը: «Ըստ էության, մենք պատմության նոր էջ ենք բացում բարձր տեխնոլոգիաների ոլորտի զարգացման համար. Կառավարությունը հանձն է առնում յուրաքանչյուր տարի շուրջ 40 մլրդ դրամ ներդնել այս ոլորտում»,- նշել է Հակոբ Արշակյանը:
Լրամշակված նախագիծը ստացել է դրական եզրակացություն:
