Հաճույքով կդիտարկեմ Արթուր Վանեցյանի կուսակցությունում աշխատելու հնարավորությունը. Ռոբերտ Հարությունյան
Աջակցիր «Ա1+»-ինՀայկական զարգացման գործակալության տնօրեն, ԵՏՄ տնտեսական հանձնաժողովի կոլեգիայի անդամ Ռոբերտ Հարությունյանը, ով ի դեպ, նախկին վարչապետ Խոսրով Հարությունյանի որդին է, ԱԱԾ նախկին տնօրեն Արթուր Վանեցյանի հիմնադրած Հայրենիք հիմնադրամի հոգեբարձուների խորհրդի անդամ է։
«Ա1+»-ը Ռոբերտ Հարությունյանի հետ զրույցել է հիմնադրամի հոգաբարձուների խորհրդին նրա անդամակցության եւ այլ թեմաների շուրջ։
-Պարոն Հարությունյան, Դուք ԱԱԾ նախկին տնօրեն Արթուր Վանեցյանի հիմնադրած Հայրենիք հիմնադրամի հոգեբարձուների խորհրդի անդամ եք: Ինչպե՞ս ստացվեց ձեր համագործակցությունը, Ա.Վանեցյա՞նն է Ձեզ հրավիրել:
- «Հայրենիք» հիմնադրամի գաղափարախոսությունը բավականին հոգեհարազատ է ինձ, որովհետև հետապնդում է տարբեր` սկսած սոցիալ-տնտեսական,մշակութային, գիտակրթական ոլորտներում զարգացման ծրագրեր: Հիմնադրամը նպատակ ունի աջակցելու լայն խավերին` ընտանիքներին,գործարարներին, որոնք ունեն զարգացման ծրագրեր: Հայաստանի զարգացման հիմնադրամում ունեցած իմ նախկին փորձը և ընդհանրապես աշխատանքային փորձը այս ուղղությունների հետ առնչություն ունեցել է, և ես գաղափարը հետաքրքիր համարեցի ու միացա: Առաջարկությունը, այո, եղել է պարոն Վանեցյանի կողմից:
- Աջակցություն ասելով` ի՞նչ նկատի ունեք: Ֆինանսակա՞ն աջակցության մասին է խոսքը:
- Հիմնադրամի կանոնադրությամբ սահմանված նպատակները լայն են,այդ թվում նաև ֆինանսական աջակցություն: Բայց ոչ թե բարեգործություն, այլև` ֆինանսական աջակցություն: Իհարկե, բարեգործություն էլ կա, բայց ավելի շատ մենք ֆինանսավորելու ենք տարբեր ծրագրեր իրականացնող ընկերություններին:
- Իսկ ֆինանսավորման գումարը որտեղի՞ց եք վերցնելու:
- Այս պահի դրությամբ գումարը ձևավորված է Վանեցյանների ընտանիքի կողմից, բայց հիմնադրամը ենթադրում է ֆինանսավորում նաև տարբեր գործընկերների կողմից: Նոր ենք սկսում, ենթադրում եմ, առաջիկայում մենք կներկայացնենք հիմնադրամի նպատակները, և կարծում եմ, կունենանք աջակիցներ, որոնք կարողեն ֆինանսական ներդրում ունենալ «Հայրենիքի» գործունեության մեջ:
- Ա.Վանեցյանը իր բիզնեսների՞ց է ֆինանսավորում, հրապարակվեց, որ նա միջնորդավորված բաժնեմաս է ունեցել Զանգեզուրի պղնձամոլիբդենային կոմբինատում:
- Այդ հարցով ես կոռեկտ չեմ համարել հետաքրքրվել, կարող եք նրանից հարցնել:
- Ա.Վանեցյանը ակնարկել էր, որ կուսակցություն է հիմնելու և քաղաքականությամբ է զբաղվելու: Հնարավո՞ր է՝ հիմնադրամը լինի դրա սկիզբը, և Դուք ընդգրկված եք նաև այդ պրոցեսներում:
- Այս պահին կան այդ խոսակցությունները, դա հիմնադրամից առանձին է: Պարոն Վանեցյանը նախատեսում է կուսակցություն հիմնել: Այսօրվա դրությամբ ես ներգրավված եմ միայն հիմնադրամի աշխատանքներում, բայց նաև հաճույքով կդիտարկեմ կուսակցական շրջանակներում աշխատելու հնարավորությունը:
- Դուք եղել եք ԵՏՄ տնտեսական հանձնաժողովի կոլեգիայի անդամը և կառույցի ներքին հարաբերություններին ծանոթ եք: Ձեր կարծիքով՝ ինչո՞ւ են լարված հայ-ռուսական հարաբերությունները: Ամեն դեպքում երկու կողմերն էլ դա չեն թաքցնում:
- Այո, հարաբերությունները հեռու են իդեալական կոչվելուց, և ես կարծումեմ, որ այդ ուղղությամբ պետք է աշխատանք տանել: Կարծում եմ պետք է ռուսական կողմի հետ բանակցել, աշխատել նրանց հետ: Աշխատել այն խնդիրների շուրջ, որոնք իրենց համար կարևոր են, զգայուն են և հասկանալ, թե ինչ լուծումներ կան: Ես գնահատում եմ, որ ՌԴ արտգործնախարար Սերգեյ Լավրովի վերջին հայտարարությունը չպետք է արվեր այդ տեսքով, դա պետք է արվեր աշխատանքային մթնոլորտում: Իմ գնահատմամբ՝ կոնտակտը լավ չեն աշխատում, դրա համար էլ մեսիջները հրապարակային են գալիս:
- ՀՀ իշխանությունների գործողություններից ինչը՞ դուր չի գալիս ՌԴ-ին:
- Մենք կարող ենք դատել միայն այն հայտարարություններով, որոնք հրապարակային են: Ս. Լավրորվը խոսել էր այն գործընթացների մասին, որոնք կան ՀՀ-ում ռուսական ընկերությունների նկատմամբ: Կարծում եմ, այստեղ որոշակի երկխոսության պակաս կա:
-Ս. Լավրովը խոսեց Հարավկովկասյան երկաթուղու մասին, որտեղ խոշոր չարաշահում է հայտնաբերվել: ՌԴ-ն ուզում է, որ ՀՀ իշխանությունները ա՞չք փակեն այդ չարաշահման դեմ և գործ չհարուցե՞ն:
- Դա նշանակում է, որ կա կոնկրետ դեպք, որը չի ընդունում ռուսական կողմը կամ չի ընդունում հայկական կողմի հիմնավորումները: Պետք է խոսել և բացատրել, թե որն է իրականությունը: Չեմ կարծում, թե ռուսական կողմը օրինականությունից դուրս ինչ-որ բան պահանջի: Ես չեմ ասում աչք փակել, ես ասում եմ երկխոսել և հիմնավորել այդ չարաշահումները, եթե դրանք կան:
- Ինչո՞ւ է ՌԴ-ն ցանկանում բարձրացնել ՀՀ-ին վաճառվող գազի գինը այն դեպքում, երբ արդեն եվրոպական երկրները գազը շատ ավելի էժան են գնում, նավթն է կտրուկ էժանացել:
- Գազը ոչ այնքան տնտեսական, որքան քաղաքական խնդիր է, և պետք է հասկանալ ՌԴ-ի այդ քայլի պատճառը: Ս.Լավրովն ասաց՝ դուք հիշում եք ռազմավարական գործընկեր լինելու մասին այն ժամանակ, երբ դա ձեզ է պետք: Տվյալ դեպքում, կարծում եմ, գազի գինը գործիք է:
- Վերադառնալով Ա.Վանեցյանին վերաբերող հարցերին` կարծիքներ հնչեցին, թե նա կարող է լինել այլ երկրի գործակալ: Դատելով այն հանգամանքից, որ նա ԱԱԾ տնօրեն է եղել, և այդ կառույցը կրում է ՌԴ ազդեցությունը, հնարավո՞ր է, նրա ստեղծած թե՛ հիմնադրամը, թե՛ կուսակցությունն այդ երկրի ազդեցությունը կրի:
- Ես դա անլուրջ եմ համարում, և այս պահին կարող եմ ասել, որ հիմնադրամը նման խնդիր չունի:
- Նաև կարծիք կա, որ Ա.Վանեցյանը իր հիմնադրամի ու նոր ստեղծվելիք կուսակցության աշխատանքներով համագործակցելու է նախկին նախագահ Ռոբերտ Քոչարյանի հետ: Ռ.Քոչարյանն էլ նրա միջոցով ցանկանում է իրեն սատարող նոր ուժ ստեղծել:
- Հիմնադրամը քաղաքական նպատակներ չունի, իսկ կուսակցությունը դեռ չի ձևավորվել:
- Իսկ ինչպե՞ս եք գնահատում նոր կորոնավիրուսի առաջացրած ճգնաժամի հետևանքների վերացմանը կամ մեղմացմանն ուղղված` իշխանությունների ծրագրերը:
- Տնտեսական տեսանկյունից դրանք բավարար չեն: Առաջիկայում ունենալու ենք, կարծում եմ, հիմա էլ ունենք սպառման անկում, իսկ դա նշանակում է, որ մեր տնտեսվարողները ապրանքների իրացման խնդիր են ունենալու: Այդ ծրագրերում մենք պետք է հաշվի առնենք ոչ միայն ՀՀ ներսում տիրող իրավիճակը, այլև մեր արտահանման շուկաներում գոյություն ունեցող խնդիրները: Այսօրվա դրությամբ ընկերություններ կան, որոնց արտահանման պայմանագրերը ռուսական կողմից չեղարկվում են,քանի որ անկայունություն կա: Եվ այդ ընկերությունները բավականին լուրջ վնասներ են կրում: Դա բերելու է ծախսերի ու աշխատատեղերի կրճատման:
Եթե այդ ընկերություններին չաջակցենք,ապա գործազրկությունը մեծանալու է: Ի դեպ դրա մասին արդեն խոսվեց` 40 հազար գործազրկություն կլինի, չի բացառվում, որ ավելին լինի: Եվ կարծում եմ, ոչ միայն վարկային աջակցություն առաջարկել, այլև ավելի լայն օգնություն ցուցաբերել` անգամ փոխհատուցել ծախսերը, հետաձգել հարկային պարտավորությունները: Վարկային միջոց տալով՝մենք հետաձգում ենք տնտեսական ճգնաժամը, բայց չենք վերացնում: Շատ հավանական է, որ այսօր վարկեր վերցնող ընկերությունները մեկ տարի հետո սնանկանան, և մենք ստիպված լինենք այս խնդիրները լուծել մեկ տարի հետո:
