Ռուբեն Մեհրաբյան. «Հայաստանը կարծես սպիդով հիվանդ լինի» (տեսանյութ)
Ինչպե՞ս համադրել անհամադրելին. խոսքն այս դեպքում Հայաստանի արտաքին քաղաքականության մասին է՝ ինչպես զարգացնել հարաբերությունները ՆԱՏՕ –ի հետ՝ հաշվի առնելով պարտավորությունները, որ Հայաստանը ստանձնում է ՀԱՊԿ նոր համաձայնագրով:
Ռազմական եւ քաղաքական հարցերով փորձագետ, «Կովկաս» ինստիտուտի փոխտնօրեն Սերգեյ Մինասյանի կարծիքով, կան խնդիրներ, որոնք տեսանելի ապագայում չեն կարող լուծվել, եւ ՆԱՏՕ-ն չի կարող անվտանգության երաշխիքներ տալ, քանի որ Հայաստանը տեսանելի ապագայում չի կարող ՆԱՏՕ անդամ երկիր դառնալ: «Ինչ վերաբերում է ՀԱՊԿ-ին, ապա այս կառույցի առանձնահատկությունը Հայաստանի համար, այն է, որ նա դառնում է հովանոց, որն իր մեջ պարունակում է հայ-ռուսական ռազմաքաղաքական հարաբերությունները»:
ՄԱՀՀԻ-ի փորձագետ Գեւորգ Մելիքյանի կարծիքով, ՀԱՊԿ-ը կրկնում է ՌԴ-ի արտաքին քաղաքականությունը եւ համընկնում է ռուսական դոկտրինի հետ: Սա իր վտանգներն ունի. ոչ ոք չի կարող երաշխավորել, որ Ռուսաստանը Հայաստանին չի ներքաշի այն հակամարտությունների մեջ, որոնցում ինքն է ներքաշված: Փորձագետն ընդգծում է՝ չկա որեւէ հիմք, որով Հայաստանը կկարողանար մերժել Ռուսաստանին, նման պարագայում:
«Հայաստանը ոնցոր լինի սպիդով հիվանդ, այսինքն, երբ սառնարանի դուռը բացում ես, կարող ես թոքաբորբ կպնել: Կարող են պահանջ դնել՝ հանեք դեսպանատները»,-ասաց քաղաքագետ Ռուբեն Մեհրաբյանը:
Ըստ փորձագետների՝ այս հարցերի պատասխանը պետք չէ փնտրել ոչ Ռուսաստանում, ոչ էլ ՆԱՏՕ-ում։ Ինչպես Հայաստանն իրեն կդիրքավորի, այդպես էլ նրան կվերաբերվեն։
