Տեխնոլոգիական նորարարությունների մասին դասագիրք՝ հնացած տեխնոլոգիաներով (տեսանյութ)
Հանրակրթական դպրոցների ինֆորմատիկայի դասագրքի շապիկից արդեն պարզ է՝ դասագրքի ժամանակը վաղուց է անցել: «Անգամ դասագրքի շապիկի վրա ինտերնետ էքսփլորերի նկարն է, որ մայքրոսոֆթը 2015-ին է հանել շահագործումից։ Այսինքն, հենց դասագիրքը տեսնելիս, երեխան հանդիպում է հնացած վինտաժի», - ասում է մեդիափորձագետ Սամվել Մարտիրոսյանը: Նա ընդգծում է՝ ինֆորմատիկան միակ առարկան է, որին, երբեմն աշակերտն ավելի է ծանոթ, քան ուսուցիչը: Մինչեւ, դասագրքի տպագրական գործընթացն ավարտվում է, նյութն արդեն հնանում է: 21-րդ դարում, երբ յուրաքանչյուր երեխայի ձեռքին ինտերնետին միացած հեռախոս եւ պլանշետ կա, ինֆորմատիկայի դասագիրք հասկացությունն արդեն իսկ անիմաստ է: Աշակերտների հետ շփման բազմամյա փորձ ունեցող ինֆորմատիկայի ուսուցիչ Հասմիկ Այվազյանը համակարծիք է, դասագրքում ինֆորմացիան հնացած է: Հետեւում են ուսումնական պլանին, հետ են մնում աշխարհից: «Դպրոցում Ինֆորմատիկա առարկայի դասավանդման ծրագիրը 12 տարի առաջ է հաստատվել, երբ տեխնիկապես լավ զինված էր համարվում դպրոցը, որը մի քանի համակարգիչ ուներ։ Դասագրքի մրցույթը 6 տարի առաջ է եղել: Ի դեպ, մրցույթին միայն մեկ գիրք է ներկայացվել»,- ասում է դասագրքի համահեղինակ Սեյրան Ավետիսյանը։ Նրա կարծիքով, դասագրքի նյութը շատ հաճախ պետք է թարմացվի։ Կրթության ազգային ինստիտուտում խնդիրներին տեղյակ են: Նոր նախագիծ են մշակում, որ պետք է Ազգային ժողով ներկայացնեն: Վստահեցնում են, բոլոր մտահոգությունները հաշվի են առել: Նախատեսում են գործը մինչեւ տարեվերջ ավարտել: «Ներառել ենք ամպային տեխնոլոգիաները, վեբ գործիքները, սմարթ հավելվածները, որ երեխաները հավեսով սովորեն»,- ասում է կրթության ազգային ինստիտուտի ինֆորմատիկայի եւ ՏՏ բաժնի վարիչ Ռուզաննա Ստեփանյանը։ -Ինչքան էլ նախարարությունը շտապի տեխնոլոգիայի զարգացման տեմպին չի հասնի, ասում է Սամվել Մարտիրոսյանը: Մի ելք է տեսնում՝ աշակերտներն ինֆորմատիկան վիդեոդասերով պետք է սովորեն։
