«Ազգային փոքրամասնություններն իշխանությունների հետ են աշխատում» (տեսանյութ)
Հայաստանում ասորական համայնքի ներկայացուցիչ Անահիտ Խոսրոեւան համոզված է՝ ազգային փոքրամասնություններից ընտրված պատգամավորները չեն կարող խորհրդարանում որեւէ հարց լուծել: «Կապ չունի, որ իշխող կուսակցությունն են ներկայացնում, գուցե ճիշտ կամ ընդդիմադիր բաներ ասեն, բայց դա չի կարող լինել որոշիչ: Հենց դրա համար էլ որպես օրինաչափություն, միշտ էլ ազգային փոքրամասնությունների ներկայացուցիչները իշխանությունների հետ են աշխատում»,- այսօր լրագրողների հետ հանդիպման ժամանակ նշեց ասորական համայնքի ներկայացուցիչը: Նրա խոսքերով՝ Ընտրական օրենսգիրքը շատ բարեփոխումների պետք է ենթարկվի, եւ հույս ունի, որ ընտրված պատգամավորները կնախաձեռնեն դա: Ասորական համայնքն, ըստ նրա, քաղաքական խնդիրներ չունի իշխանության, կառավարության հետ: Նրանց խնդիրը մշակութային եւ կրթական հարցերն են: Այսօր ասորիների խնդիրը այն է, որ դասագրքեր չկան, ուսուցիչները քիչ են: Անահիտ Խոսրոեւան հույս ունի, որ այդ կարգի խնդիրները ԱԺ-ում լուծում կստանան: Նա կարծում է, որ ընտրված 4 պատգամավորները պետք է ներկայացնեն ոչ թե 4 ազգերի խնդիրները, որոնք կան Հայաստանում որպես ազգային փոքրամասնություն, այլ նաեւ բոլոր 11 ազգերի խնդիրները:
