Գունազարդ «հրավառություն» համալիրի տարածքում (տեսանյութ)
Գունավոր միջոցառում՝ բառի բուն իմաստով։ Կարեն Դեմիրճյանի անվան մարզահամերգային համալիրի հարակից տարածքում այսօր առավոտյան մեկնարկեց երևանյան գունազարդ վազքը (YEREVAN COLOR RUN)։ Այն միջազգային ձևաչափ ունեցող միջոցառում է, որն անցկացվում է աշխարհի տարբեր երկրներում՝ Ռուսաստան, ԱՄՆ, Ավստրալիա, Բրազիլիա և այլն։
Միջոցառման ամբողջ ընթացքում տարածքում հավաքված հարյուրից ավելի երիտասարդները միմյանց ցողում էին գունավոր փոշեներկերով։ Գունազարդ «հրավառություն»-ը բարձր տրամադրություն էր պարգևել երիտասարդներին։ Մասնակցության համար նրանցից յուրաքանչյուրը վճարել էր 3000 դրամ։ Միջոցառումից ստացված հասույթի մի մասը հատկացվելու է «Հայ մայրեր» բարեգործական հիմնադրամին։
«Մենք Հայաստանում զարգացնում ենք մասսայական սպորտը, և ես որոշեցի կազմակերպել այս միջոցառումը։ Մարդիկ շատ լավ ընդունեցին այն։ Ծրագրի շրջանակում նաև օգնելու ենք հաշմանդամություն ունեցող մի փոքրիկ տղայի»,-ասաց Run Armenia նախագծի հիմնադիր Ղազար Հակոբյանը։
Միջոցառումն անցկացվեց Run Armenia նախագծի նախաձեռնությամբ և Երևանի քաղաքապետարանի աջակցությամբ՝ SPRING PR ընկերության հետ համատեղ։
Լավագույն վազորդները պարգևատրվեցին մեդալներով։
