100 մետրանոց Եռագույնը ծածանվեց Նեմրութի բարձունքին
Մեծ Եղեռնի խորհուրդը կրող՝ 100 մետրանոց Եռագույնը ծածանվեց Նեմրութի բարձրունքում, հին հայկական սրբավայրում
Մեծ Եղեռնի խորհուրդը կրող՝ 100 մետր երկայնք ունեցող Եռագույնն ամեն անգամ բացվելով և ծածանվելով, գրավում է մարդկանց ուշադրությունը և ևս մեկ անգամ հիշեցնում կատարված ոճրագործության մասին: Արևմտյան Հայաստանում իրականացվող ֆլոշմոբ-ակցիաների շարքի ընթացքում՝ Եռագույնն ամեն անգամ ծածանվելով, համայն աշխարհի ուշադրությանն է ներկայացնում նաև մեր հնամենի վայրերն ու շինությունները, որոնք ներկայացնում են զուտ Հայկյան մշակույթն ու պաշտամունքները, վկայում, որ այդ վայրերում, դեռ հազարավոր տարիներ առաջ, ապրել և արարել են հայեր: Այդիսկ պատճառով «Տիգրան Մեծ» Բարեգործական Հիմնադրամը իր հնարավորության սահմաններում շարունակում է Արևմտյան Հայաստանի տարածքներում իրականացվող ֆլեշմոբ-ակցիաների շարքը:
Օգոստոսի 12-ին տեղի ունեցող Նավասարդի՝ հնագույն հայկական Ամանորի տոնի առիթով Մեծ Եղեռնի խորհուրդը կրող Եռագույնը եղավ նաև Նեմրութ լեռան բարձրունքում գտնվող հայ աստվածների հուշարձանախմբից կազմված հին հայկական սրբավայրում: Այս մասին մեզ հայտնում է Արցախայան ազատամարտի մասնակից, ֆոտոլրագրող, «Տիգրան Մեծ» Բարեգործական Հիմնադրամի նախագահ Սրապիոն Գևորգյանը, ով նաև 100 մետր երկայնք ունեցող Հայոց Եռագույնի հեղինակն է:
Օգոստոսի 12-ի առավոտյան հայ զբոսաշրջիկներից կազմված ուխտավորների խումբը սկսել է նվաճել լեռան բարձրունքը, ինչից հետո՝ հնագույն հայկական սրբավայրի շուրջ պարզելով Մեծ Եղեռնի խորհուրդը կրող դրոշը, շրջան է կազմել և 100 վայրկյան լռոթյամբ հարգել Մեծ Եղեռնի անմեղ զոհերի հիշատակը:
Հիշեցնենք, որ օգոստոսի 11-ին «Տիգրան Մեծ» Հիմնադրամին հաջողվել է Եռագունը ծածանել նաև պատմական Հայաստանի Մեծ Հայքի Մոկք նահանգի Միջա գավառում, Սարիխաչ լեռան հարավ-արևմտյան լանջին, Ապարանից Սուրբ Խաչ վանքի լեգենդար խաչքարերի շուրջ, որոնք իրենց 12-ից 14-տոննա կշռով և 6 մետր բարձրությամբ՝ ոչ միայն աշխարհի ամենամեծ խաչքարերն են, այլ նաև հայ ազգի երբեմնի զարգացածության, կրթվածության և ուժի վկան:
Նշված նախաձեռնությունները հնարավոր եղավ իրականացնել «Ախթամար տուր» գործակալության աջակցության շնորհիվ:
«Տիգրան Մեծ» Բարեգործական Հիմնադրամ
