Բացել լրահոսը Փակել լրահոսը
AN3 (1)
A A
Քաղաքականություն

ԱՀ Ազգային ժողովի մշտական հանձնաժողովներում շարունակվում են 2021թ․ պետական բյուջեի կատարողականների քննարկումները

Մայիսի 18-ին հրավիրվել է ԱՀ Ազգային ժողովի արտադրության և արտադրական ենթակառուցվածքների հարցերի և ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստ։

ԱԺ քննարկմանն են ներկայացվել գյուղատնտեսության, քաղաքաշինության, տարածքային կառավարման և ենթակառուցվածքների ու  ֆինանսների և էկոնոմիկայի նախարարությունների  2021 թ․ բյուջեով նախատեսված ծախսերի կատարողականները։

ԱՀ գյուղատնտեսության նախարարի տեղակալ Տիգրան Առստամյանի տեղեկացմամբ՝ հաշվետու տարում նախարարության հաստատված բյուջեն 9 մլրդ 845 մլն 847 հազ ՀՀ դրամ էր, որի կատարողականը կազմել է 7 մլրդ 262 մլն 862,7 հազ ՀՀ դրամ։

«Տնտեսական զարգացման ծրագրեր» ծրագրի իրականացման համար 2021թ․ պետական բյուջեից հատկացվել էր 512 մլն 2 հազ․ ՀՀ դրամ, փաստացի ծախսվել է 327 մլն 749,4 հազ ՀՀ դրամ, որն հիմնականում ուղղվել է տեղական արտադրողներին աջակցությանը։

ԱՀ բուսաբուծության համալիր զարգացման ծրագրի իրականացման համար 2021թ պետբյուջեով հատկացվել էր 1մլրդ 484 մլն 790 հազ ՀՀ դրամ , կատարողականը կազմել է 354 մլն 197,4 հազ․ ՀՀ դրամ։

Արցախի Հանրապետությունում անասնապահության զարգացման խթանման ծրագրի աշխատանքների իրականացման համար 2021թ․ բյուջեից տրամադրվել էր 105 մլն դրամ, որի դիմաց կատարողականը կազմել է 101մլն 723,7 հազ  ՀՀ դրամ։

Մանրամասն ներկայացնելով 2021թ․ պետական բյուջեի՝ նախարարության ծրագրերին և միջոցառումներին  ուղղված  հատկացումները ,նախարարի տեղակալը ընդգծել է, որ 2021թ․ ԱՀ էկոնոմիկայի և գյուղատնտեսության նախարարության քաղաքականությունը նպատակաուղղված էր հողօգտագործման ու անասնապահության վարման կատարելագործմանը, անասնաբուժական գործի արդյունավետության բարձրացմանը, պետական աջակցության մեխանիզմների միջոցով երկրում ՓՄՁ զարգացման խթանմանը, սննդամթերքի անվտանգության և որակի ապահովմանը, ոլորտի գերակա ուղղություններով համապատասխան աշխատանքների կատարմանն ու  ընթացիկ հիմնախնդիրների լուծմանը։

Քաղաքաշինության նախարարության 2021թ կապիտալ ներդրումների պետական պատվերի սկզբնական ծավալը նախատեսված էր 9 մլրդ 242 մլն 113 հազ ՀՀ դրամ, որը տարեվերջի դրությամբ կազմել է 25 մլրդ 460 մլն 302 հազ ՀՀ դրամ։ ԱՀ կառավարության պահուստային ֆոնդից կապիտալ շինարարության ծրագրին հատկացվել է 21,5 մլն ՀՀ դրամ, գույքի գնման ծախսերի համար՝ 116,998 մլն դրամ, արտաբյուջեի ծրագրերի համար ՝4,839 մլն դրամ։ Ընդհանուր առմամբ կապիտալ շինարարության համար 2021թ պետական բյուջեից հատկացվել էր 25 մլրդ 603մլն 639 հազ ՀՀ դրամ, կատարողականը կազմել է 25 մլրդ 96 մլն 115 հազ ՀՀ դրամ կամ 98 տոկոսը։

Նախարարի տեղեկացմամբ՝ բնակարանաշինության ծրագրերի իրականցմանը հատկացվել է 2987․852 մլն դրամ։ Այդ ծրագրերի շրջանակներում 2021թ․ կառուցվել և շահագործման է հանձնվել 35 բնակելի տուն , 957 նոր բնակելի տների կառուցման աշխատանքներն էլ սկսված են և շահագործման կհանձնվեն 2022-2023 թթ-ին։

Արցախի Հանրապետության տարածքում 2020 թվականին ծավալված պատերազմական գործողությունների հետևանքով տուժած բնակելի տների վերանորոգման-վերակառուցման կամ շինանյութեր ձեռք բերելու նպատակով արտաբյուջետային միջոցների հաշվին հատկացվել է 17,294.9 մլն ՀՀ դրամ։

Ըստ քաղաքաշինության նախարարի հաղորդման՝ զոհված ազատամարտիկների ընտանիքների բնակարանների վերանորոգման և կառուցման նպատակով պետական բյուջեից հատկացվել է 207.6 մլն ՀՀ դրամ,իսկ այլ սոցիալական խմբերին պատկանող ընտանիքների բնակելի տների վերանորոգման և կառուցման նպատակով՝ 2,181.7 մլն ՀՀ դրամ:

2021 թվականին շարունակվել է «Հայաստան» համահայկական հիմնադրամի հետ համաֆինանսավորման սկզբունքով հասարակական նշանակության, մշակույթի և ճանապարհաշինության ոլորտներում նախատեսված ծրագիրը, որի շրջանակներում հատկացվել է 70.8 մլն ՀՀ դրամ։

Նախարարի հավաստմամբ՝ 2021 թվականին քաղաքաշինության ոլորտում մշակված և իրականացված ծրագրերը հիմնականում ուղղված էին պատերազմական գործողությունների հետևանքների վերացման, տեղահանված բնակչության բնակարանով ապահովման և հանրապետության առջև ծառացած այլ հիմնախնդիրների հնարավորինս արագ լուծմանը:

ԱՀ տարածքային կառավարման և ենթակառուցվածքների նախարարության պահպանման ծախսերի համար2021թ բյուջեով  հատկացված էր 441,4 մլն ՀՀ դրամ, որի կատարողականը կազմել է 389,0 մլն դրամ։ Պահուստային ֆոնդից տարվա ընթացքում նախարարությանը տրամադրվել է 1 506,8 մլն դրամ, կատարողականը՝ 1228․0 մլն դրամ։

Բնակչության կողմից սպառված էլեկտրաէներգիայի ծախսերի որոշ մասի սուբսիդավորումը և աջակցությունը 2021թ ծախսային մասով կազմել է 5 մլրդ 133մլն  497, 177հազ ՀՀ դրամ,  գազի վճարի փոխհատուցումը ՝378մլն 621 ,615 հազ ՀՀ դրամ։

2021թ պետական բյուջեից ուղևորափոխադրումների ոլորտում առաջացած տնտեսական խնդիրների հաղթահարմանն է ուղղվել 69.3 մլն ՀՀ դրամ ։ 2020 թ պատերազմի հետևանքով քաղաքացիական պաշտպանության միջոցների իրականացման ժամանակ շահագործված տրանսպորտային միջոցների կրած վնասների փոխհատուցման համար տրամադրվել է ՝ 11.5 մլն ՀՀ դրամ։

Ընթացիկ նորոգման, բարեկարգման և կոմունալ տնտեսության գծով ԱՀ շրջանների կարողությունների զարգացման ծրագրով 2021թ․ պետական բյուջեով նախատեսված էր 1,8 մլրդ դրամ, որից ծախսվել է 1,6 մլրդ դրամը։

ԱՀ ֆինանսների և էկոնոմիկայի նախարարության  տնտեսական զարգացման ծրագրերով նախատեսված միջոցառումների իրականցման համար 2021թ․  նախատեսվել էր 582,000․2 ՀՀ դրամ, կատարողականը կազմել է 283,198․6 դրամ։

Համատեղ նիստի աշխատանքները շարունակվեցին կեսօրից հետո:

Հաշվետվությամբ հանդես են եկել պետական կոմիտեների ու հանձնաժողովների ղեկավարները:

ԱՀ կադաստրի և պետական գույքի կառավարման կոմիտեի 2021 թվականի բյուջեն պլանավորված էր 2 մլրդ 838 մլն դրամի չափով, որից փաստացի ծախսվել է 2 մլրդ 496 մլն-ը: Բյուջեից 1687230.1 հազ ՀՀ դրամը  ուղղվել է ծրագրերին, 366963,3 հազ ՀՀ դրամը՝ աշխատակազմի պահպանման ծախսերն են:

ԱՀ ջրային կոմիտեի բյուջետային ծախսերը 4 ծրագրային ուղղությամբ են.

-Գյուղատնտեսական միջոցառումների իրականացման ծրագրի պլանը   66.320.400 ՀՀ դրամ է, իսկ ֆինանսավորումը կազմել է 26.320.400 ՀՀ դրամ, որն էլ կազմում է վերջնական պլանի 39.6 տոկոսը;

-Ոռոգման նպատակով հողօգտագործողներին աջակցելու ծրագրին հատկացված ֆինանսական միջոցներից ԱՀ ջրային կոմիտեի պլանը կազմել է 232.312.300 ՀՀ դրամ,իսկ ֆինանսավորումը կազմել է 164.441.531 ՀՀ դրամ, կատարողականը՝  70.7 տոկոս։

-«Ջրային համակարգերի կառուցում,վերանորոգում,վերակառուցում ու պահպանում» ծրագրով պլանը կազմել է 3.920.000.000 ՀՀ դրամ, ֆինանսավորումը կազմել է 3.807.089.600 ՀՀ դրամ, որը կազմում է վերջնական պլանի 97.1 տոկոսը։

-«Խմելու և ոռոգման ջրի մատակարարման ծառայությունների սուբսիդավորում» ծրագրով ֆինանսավորումը կազմել է 522.826.944 ՀՀ դրամ:

ԱՀ հանրային ծառայությունները և տնտեսական մրցակցությունը կարգավորող պետական հանձնաժողովի լիազորությունների իրականացման համար տարեկան ֆինանսավորումը կատարվել է հաստատված բյուջեի 83.4 տոկոսով, որը կազմել է 169.8 մլն ՀՀ դրամ: Փաստացի ֆինանսավորման 90 տոկոսը ուղղվել է  աշխատավարձային հոդվածին, 10 տոկոսը՝ պահպանման և այլ հոդվածներին:

Արցախի ներդրումային հիմնադրամի 2021 թվականի  ֆինանսական հատկացումը 8 մլրդ դրամի չափով էր: Այն ծախսվել է ըստ առանձին ծրագրային ուղղությունների:

Գյուղի և գյուղատնտեսության աջակցության հիմանդրամի բյուջեն 4.500.000 ՀՀ դրամ էր: Այն բաշխվել է ըստ 3 ծրագրի.

-աջակցություն ԳԳԱՀ-ին

-ազնվացեղ խոշոր եղջերավոր կենդանիների արժեքի մասնակի սուբսիդավորում

-բուսաբուծության համալիր զարգացման ծրագիր:

Կատարողականը բոլոր ծրագրային ուղղություններով 100 տոկոս էր:

ԱՀ բնակարանային կոմիտեին պետական բյուջեից հատկացվել է 49 մլն 800 հազար ՀՀ դրամ, որի 94.1 տոկոսը ծախսվել է:

ԱՀ բնապահպանության կոմիտեի հաստատված բյուջեն 257 մլն 421 հազ դրամ էր, որից ծախսվել է 203 մլն-ը:

Հաշվետվություններից հետո պատգամավորները հարցեր են ուղղել պատասխանատուներին:

ԱՀ ԱԺ լրատվության և հանրության հետ կապերի բաժին