ՀՖՖ-ն հնարավորություն է տվել ակումբներին գործել առանց «ճնշումների»․ մարզական լրագրող

Հայկական ֆուտբոլային ակումբների վերջին շրջանի հաջողությունները, ըստ մարզական լրագրող Գեւորգ Ղազարյանի, կապված է առաջնության ակումբների որակի բարձրացման, ֆինանսական որոշակի կայության, գումարների ներհոսքի եւ ներդրումների ավելացման հետ․ 

«Փյունիկը գնել է Արթուր Սողոմոնյանը՝ ֆուտբոլին նվիրված մոսկվայաբնակ գործարար, Արարատ Արմենիայի անունը կապված է Տաշիր Գրուպի հետ ու նրանք, միայն նախորդ տարի մտնելով Հայաստանի առաջնության բարձրագույն խումբ, դարձան չեմպիոն ու հիմա արդեն այդ կոչման շնորհիվ պայքարում են Եվրոպական մրցասպարեզում։ Բագրատ Նավոյանը շարունակում է խոշոր գումարներ ծախսել Ալաշկերտում, Արցախը ենթարկեցին ռեբրենդինգի՝ «ՆՈԱ» կամ նույն «Նոյ» անվամբ ակումբի հիմք դրվեց, որը արդեն լրջագույն գումարներ է ծախսել։ Բանանցում ներդրումներ է անում մեկ այլ գործարար Ջևան Չելոյանցը։ Կարճ ասած՝ բոլորը գրեթե ակտիվ են»,- «Ա1+»-ի հետ զրույցում ասաց Գեւորգ Ղազարյանը։ 

Եվրոպա լիգայի մրցաշարում Հայաստանը ներկայացնող 3 ակումբներից երկուսը՝ «Արարատ-Արմենիան» ու «Փյունիկը», ստացել են որակավորման 3-րդ փուլ անցնելու ուղեգիր։ Իսկ «Ալաշկերտը» պարտությունից հետո դուրս մնաց հետագա պայքարից։ 

Արդյոք մեր ակումբների հաղթանակները կապվա՞ծ են նաեւ ՀՖՖ նոր ղեկավարության հետ։ 

Գեւրոգ Ղազարյանը նշում է, որ ֆեդերացիան դաշտն ազատականացրել է․ «ՀՖՖ-ն հնարավորություն է տվել ակումբներին՝ գործելու ավելի ազատ,  առանց՝ «ճնշումների»։ Այսինքն՝ ֆեդերացիան նպաստավոր միջավայր է ապահովում։ 

Փաստացի հենց այսօր կմեկնարկի Հայաստանի առաջնությունը, որին կմասնակցեն 10 ակումբներ, առաջին անգամ այդքան շատ՝ 2000-ականների սկզբից հետո, երբ քանակը իջավ ութի, հետո ընդհանրապես խայտառակ՝ 6-ի»։