«ԱՐԱՐԱՏԸ» ԿՄՐՑԻ ՌՈՒՍԱՍՏԱՆԻ ՉԵՄՊԻՈՆԻ ՀԵՏ
Աջակցիր «Ա1+»-ին
Երեւանի «Արարատը» «Համագործացության գավաթի» 2009թ. խաղարկությունում կհանդիպի Ռուսաստանի չեմպիոն «Ռուբինի», ինչպես նաեւ ղազախական «Ակտոբեի» եւ ուզբեկական «Պախտակորի» հետ: Այս մասին հայտնի է դարձել Մոսկվայում տեղի ունեցած վիճակահանության արդյունքում:
Ֆուտբոլային ավանդական մրցաշարին մասնակցում են ԱՊՀ եւ մերձբալթյան երկրների չեմպիոնները: Թեեւ Հայաստանի առաջնությունում հաղթել է «Փյունիկը», սակայն Մոսկվայում հունվարին կայանալիք մրցաշարին մեր հանրապետությունը կներկայացնի փոխչեմպիոն «Արարատ»-ը: «Փյունիկը» այս տարի եւս հրաժարվել է մասնակցել մրցաշարին, պատճառաբանելով, թե «Համագործակցության գավաթը» չի մտնում ակումբի նախապատրաստական ծրագրերի մեջ:
Իսկ «Արարատ» վիճակահանության արդյունքում հայտնվեց A խմբում, որտեղ հանդես կգա նաեւ մրցաշարի բացահայտ ֆավորիտ Կազանի «Ռուբինը»: Ռուսաստանի 2008թ. չեմպիոնը ամենայն հավանականությամբ մարտական կազմով ելույթ կունենա մրցաշարին: Օրերս ՌՖՄ նախագահ Վիտալի Մուտկոն հայտարարել էր, որ Ռուսաստանի չեմպիոնը պատրաստ է հիմնական կազմով հանդես գալ «Համագործակցության գավաթի» խաղարկությունում: Նախորդ տարիներին Ռուսաստանի չեմպիոնները սովորաբար 2-րդ կազմն են գործուղում Մոսկվա: Բավական ուժեղ թիմեր են նաեւ «Արարատի» մյուս 2 մրցակիցները` «Ակտոբեն» եւ «Պախտակորը»: «Ակտոբեն» վերջերս հաղթեց Ղազախստանի առաջնությունում, որի մակարդակը վերջին տարիներին զգալիորեն բարձրացել է:
Մրցաշարին չի մասնակցի Վրաստանի չեմպիոնը: Վրացիները հրաժարվել են հանդես գալ այս մրցաշարում: Փոխարենը հանդես կգա Ֆինլանդիան ներկայացնող «Ինտերը»:
«Համագործացության գավաթի» վիճակահանության արդյունքները.
A խումբ
«Ռուբին», ՌԴ
«Արարատ», Հայաստան
«Ակտոբե», Ղազախստան
«Պախտակոր», Ուզբեկստան
B խումբ
«Աշխաբադ», Թուրքմենստան
«ՄՏԶ-Ռիպո», Բելառուս
«Էկրանաս», Լիտվա
Ռուսաստանի երիտ. հավաքական
C խումբ
«Շախտյոր», Ուկրաինա
«Շերիֆ», Մոլդովա
«Լեվադիա», Էստոնիա
«Ռեդար-Թադազ», Տաջիկստան
D խումբ
«Ինտեր», Ադրբեջան
«Վենտսպիլս», Լատվիա
«Դորդոյ Դինամո», Ղրղըզստան
«Ինտեր», Ֆինլանդիա
