ՖԵԴԵՐԱՑԻԱՆ ՓՆՏՐՈՒՄ Է ՖԻՆԱՆՍՆԵՐ
Աջակցիր «Ա1+»-ին
Հայ թաեքվանդոյիստները այս տարի մասնակցել են մի շարք միջազգային մրցաշարերերի եւ որոշակի հաջողությունների հասել, սակայն դեկտեմբերին Ռուսաստանի մայրաքաղաք Մոսկվայում կայանալիք Եվրոպայի Ուսանողական գավաթի խաղարկությանը մեր պատվիրակության մասնակցությունը հարցականի տակ է:
Հայաստանի թաեքվանդոյի ֆեդերացիայի գործադիր տնօրեն Վարդան Ղահրամանյանը «Ա1+»-ին հայտնեց, որ ներկայումս ֆեդերացիան փորձում է գտնել հովանավորի. «Պետության կողմից հատկացված միջոցներով մասնակցել ենք մինչեւ օլիմպիական խաղերը կայացած մրցաշարերին: Այժմ նոր միջոցներ են անհրաժեշտ Մոսկվայում դեկտեմբերի 4-8-ը կայանալիք Եվրոպայի Ուսանողական գավաթի խաղարկությանը մասնակցելու համար: Ցանկանում ենք Մոսկվայի այս մրցաշարին մասնակցել 10 հոգանոց կազմով»:
Եվրոպայի Ուսանողական գավաթը մեծ հեղինակություն ունեցող մրցաշար է, որին մասնակցում են «Հին աշխարհամասի» բազամաթիվ ուսանող թաեքվանդոյիստներ, որոնցից շատերը հետագայում հաջողությամբ հանդես են գալիս Եվրոպայի եւ աշխարհի առաջնություններում:
Ի դեպ, 2008թ. Եվրոպայի չեմպիոն Արման Երեմյանը շուտով կմեկնի Թեհրան` մասնակցելու Իրանի բարձրագույն լիգայի թիմային առաջնության 2-րդ տուրին: Երեմյանը 1-ին տուրում հաղթանակ էր տոնել եւ այսուհետեւ պարբերաբար մասնակցելու է Իրանի առաջնությանը:
