«ՄԻԿԱՆ» ՏՈՒԺԵՑ ՄՐՑԱԿԱՐԳԻՑ
Աջակցիր «Ա1+»-ին«Աղջիկների ելույթը բավարար է, բայց ոչ լավ, քանի որ ավելի բարձր տեղերի համար էինք պայքարում, իսկ տղաների պայքարում խնդիր էինք դրել պայքարել առաջին տեղի համար եւ գրաված 12-րդ հորիզոնականը չէր կարող գոհացնել», - «Ա1+»-ի հետ զրույցում ասաց «Միկա» շախմատային ակումբի տնօրեն եւ ավագ Աշոտ Վարդապետյանը` մեկնաբանելով Եվրոպայի 2008թ. ակումբային առաջնությունում ունեցած ելույթները:
Տղամարդկանց պայքարում «Միկան» վարկանիշով 2-րդն էր, սակայն գրավեց ընդամենը 12-րդ հորիզոնականը, իսկ կանանց պայքարում հայկական թիմը հանգրվանեց 5-րդ տեղում: Աշոտ Վարդապետյանը տղամարդկանց թիմից առանձնացրեց Լեւոն Արոնյանին. «Ճիշտ է Լեւոնը վերջին տուրում պարտվեց, բայց ընդհանուր առմամբ լավ խաղաց: Մասնավորապես «Սարանսի» հետ հանդիպման ժամանակ նրա պարտիան ուկրաինցի Վոլոկիտինի հետ, որում Արոնյանը հաղթեց, իմ կարծիքով, կարող է հավակնել 2008թ. լավագույն պարտիայի մրցանակին: Թիմի մնացած անդամները խաղացին փոփոխական հաջողությամբ, բացառությամբ Արման Փաշիկյանի, որը 6-րդ խաղատախտակի վրա փայլուն խաղաց` 6 պարտիայից 5-ում տոնելով հաղթանակ»:
«Միկայի» տնօրենի կարծիքով` Հայաստանի չեմպիոնը տուժել է նաեւ մրցակարգից, որը չի արդարացնում իրեն. «Դրեզդենում շուտով քննարկվելու է այս մրցակարգի հարցը: Ներկայումս վիճակահանությունը այնպես է կատարվում, որ թիմերը հայտնվում են անհավասար պայմաններում: Բացի այդ Եվրոպայի առաջնությունը անցկացվում է 7 տուրով, 64 մասնակիցների առկայությամբ եւ դա չի բավարարում, որպեսզի որոշվի ռեալ ուժեագույն թիմը: Գործող մրցակարգի դեպքում ցանկացած պարտություն կարող է ճակատագրական լինել, ինչպես որ եղավ մեր դեպքում: 5-րդ տուրում մենք ցավալի պարտություն կրեցինք «Բադեն-Բադենից» եւ նահանջեցինք, մինչդեռ մինչ այդ 4 հաղթանակ էինք տոնել, այդ թվում հաղթելով ապագա չեմպիոն «Ուրալին», որը իր միակ պարտությունը կրեց մեզանից»:
Ըստ Աշոտ Վարդապետյանի` Եվրոպայի ակումբային առաջնությունը հավաքագրել էր գրեթե բոլոր ուժեղագույն շախմատիստներին. «Կարելի է ասել բացակայում էին միայն այն շախմատիստները, որոնք ներկայումս առնչություն ունեն Կրամնիկ - Անանդ չեմպիոնական մրցամարտին: Թիմերը շատ լուրջ էին մոտեցել առաջանությանը` իրենց կազմերում ընդգրկելով լավագույն գրոսմայստերներին»:
Մրցաշարը ցույց է տվել նաեւ, որ Հայաստանի մի շարք տաղանդավոր շախմատիստներ ունի արտասահմանյան թիմերում. «Բոսնիայի «Բոսնիա» թիմը գլխավորում էր Սերգեյ Մովսիսյանը, որը իր խաղատախտակի վրա ցույց տվեց 2-րդ արդյունքը, եւ զիջեց միայն Տիգրան Ղարամյանին, որը ներկայումս բնակվում է Ֆրանսիայում եւ հանդես էր գալիս բելգիական ակումբում: Շատերի համար անսպասելիորեն Ղարամյանը գրավեց առաջին տեղը: Շատ լավ հանդես եկավ Վլադիմիր Հակոբյանը, որը ելույթ էր ունենում իսպանական «Լինեքս» թիմում եւ 4-րդ խաղատախտակի վրա գրավեց 1-ին տեղը: Հունական «Սալոնիկ» թիմից էր հանդես գալիս Դավիթ Զաքարյանը, որը նաեւ «Միկայի» հետ հանդիպման ժամանակ հաղթեց Տիգրան Պետրոսյանին: Կային մի շարք նաեւ այլ հայ շախմատիստներ»:
