Կենդանաբանական այգու արջերը հոշոտել են նորաբնակ արջին (տեսանյութ)
Կենդանաբանական այգում գորշ արջ է սատկել: Երկու արջ հարձակվել են 6 ամիս իրենց հարևանությամբ ապրող էգ արջի վրա, որից հետո հոշոտել են նրան: Դեպքը տեղի է ունեցել վաղ առավոտյան, երբ այգու աշխատակիցները դեռ աշխատանքի չեն եկել: «Երբ մենք տեղեկացանք, կենդանին արդեն անկված էր: Մենք ուսումնասիրեցինք ատամների մաշվածությունը եւ որոշեցինք մոտավոր տարիքը, նա բավականին երիտասարդ էր եւ կռվել է ավելի տարքիով մեծ կենդանիների հետ », ասում է գլխավոր կենդանաբույծ Աննա Ասատուրյանը: Այգու մասնագետներն անկումը բացատրում են արջերի ներտեսակային պայքարով եւ այն բնական համարում: Կենդանաբույժ Հարություն Հովհաննիսյանը հիշում է տարիներ առաջ գրանցված եւս մեկ նմանատիպ դեպք: «Մոտ 4-5 տարի առաջ երկու էգ առյուծներ վնասեցին միմյանց եւ մահվան դեպք գրանցվեց »: Դեպքը համացանցում բուռն քննարկվեց, հիմնականում շրջանառվում էր այն վարկածը, թե արջերը սովից են հարձակվել միմյանց վրա: Այգու աշխատակիցը հերքում է լուրը: «Կենդանիները սոված չեն եղել, ես բացառում եմ, հակառակը՝ նրանք բտման սեզոնում են հիմա գտնվում եւ պատրաստվում են ձմռանը »: Արջերի կռվին ականատես են եղել այգու անվտանգության աշխատակիցները: Արդյո՞ք նրանք չէին կարող համապատասխան միջոցներ ձեռնարկել: «Անվտանգության աշխատակիցները շրջում են տարածքում եւ չեն կարող մեկ վանդակի կողքն անընդհատ հերթապահել »: Հարցին, արդյո՞ք այդ պահին ձայներ չեն լսվել, Հարություն Հովհաննիսյանը ասաց. «Կարող է անձայն էլ լինել այդ պրոցեսը »: Սակայն գլխավոր կենդանաբույծ Աննա Ասատուրյանը վստահեցնում է՝ եթե դեպքն այլ ժամի տեղի ունենար հնարավոր կլիներ կանխել արջի անկումը: «Մենք նման դեպքերում օգտագործում ենք պայթուցիկներ, նաեւ մեր ձայները կխանգարեին եւ կկարողանայինք նրանց իրարից զատել »: Աննա Ասատուրյանը դժվարանում է արջի մասին հավելյալ տեղեկություններ հայտնել, իդենտիֆիկացիոն կոդը, որը տեղադրված էր կենդանու մաշկի տակ անկման ընթացքում վնասվել է: Կենդանաբանական այգու տնօրինության կողմից դեպքի առնչությամբ կատարվում է փորձաքննություն։ «Ա1+»-ի հարցն, թե արդյո՞ք անկված արջը Մանվել Գրիգորյանի առանձնատնից բերվածն է, այգու աշխատակիցը հերքեց, նշելով, որ Մանվել Գրիգորյանի առանձնատան արջերը պահվում են այլ վայրում։
