Թե բնական, թե արհեստական տոնածառը ալերգիայի աղբյուր է. մասնագետ
Նոր տարվա կարևոր խորհրդանիշ եղևնին պարտադիր է շատ ընտանիքների համար։ Թեև այն ապահովում է մեր տոնական տրամադրությունը, բայց պարզվում է, որ այն այնքան էլ անվտանգ չէ։ «Ալերգոլոգիայի և Իմունոլոգիայի» կենտրոնի ղեկավար Սևան Իրիցյանը ալերգիաներից խուսափելու համար խորհուրդ է տալիս նախապատվությունը տալ արհեստական եղևնիներին։
«Բնական եղևնի պետք չէ օգտագործել նախ` բնապահպանական տեսանկյունից, այսինքն՝ «կանաչ նպատակներով»։ Հետո բնականը կարող է ալերգիա առաջացնել, քանի որ նրանում միշտ առկա են բորբոսասնկեր, որն էլ իրենով կարող է խնդիր առաջացնել զգայուն մարդկանց մոտ»,- նշում է Սևան Իրիցյանը։
«Եղևնու» ալերգիայի նախանշանները կարելի է հեշտությամբ շփոթել մրսածության հետ, քանի որ այն հիմնականում առաջացնում է փռշտոց, քոր քթում և աչքերում, դժվարաշնչություն։ Այն կարող է առաջացնել նաև եղնջացան։
«Սովորաբար այս սեզոնին ում ինչ լինում է, ասում են մանդարինից էր կամ խառը շատ կերանք»,- նկատում է Սևան Իրիցյանը։
Թեև արհեստական եղևնին ալերգոլոգն ավելի նախընտրելի է համարում, այնուամենայնիվ այն նույնպես բացարձակ անվտանգ չէ։
«Արհեստական տոնածառն ավելի նախընտրելի է, բայց պետք է հաշվի առնել, որ սինթետիկ պոլիմերները ակտիվ կուտակում են տնային փոշի՝ տնային փոշու տիզը, այդ իսկ պատճառով պետք է ամեն տարի տեղադրելուց առաջ խոնավ շորով մաքրել, չորացնել»,- նշում է Սևան Իրիցյանը։
Սևան Իրիցյանի պնդմամբ՝ ալերգոլոգիայի լավագույն կանխարգելման մեթոդը՝ իմանալ ալերգենն ու խուսափելն է։ Նա խորհուրդ է տալիս պարզապես հեռու մնալ ալերգիայի աղբյուր հանդիսացող բնական եղևնու կիրառումից։
