Տունը հայտնվել է կամրջի տակ (տեսանյութ)
Գեւորգյանների տունը հայտնվել է մայրաքաղաքի հարավային մուտքն ապահովող կամրջի տակ: «Կամուրջը շատ մոտիկ է: Ամսի 30-ին հենց այստեղ մեքենան եկել, խփել էր: Մեր բախտը բերել էր նրանով, որ սյունին էր կպել: Եթե չլիներ, պետք է ընկներ մեր տան վրա: Ննջասենյակներն այս կողմում են եւ երեխաներին վախենում եմ քնեցնել այնտեղ: Չես իմանա գիշերը ինչ կկատարվի»,- «Ա1+»-ին ասաց Նունե Գեւորգյանը: Կառավարության որոշմամբ Արշակունյաց պողոտա-Շիրակի փողոց-Արտաշատի խճուղու հատվածի որոշ տները հանրային գերակա շահ ճանաչվելուց հետո քանդվել են: Այս տունը այդ ծրագրում չի ընդգրկվել: Սակայն կամրջի կառուցման ընթացքում արդեն պատերին ճեղքեր են առաջացել։ Գեւորգյանները դիմել են դատարան, սակայն հայցը վարույթ չի ընդունվել՝ պատճառաբանությամբ, թե քաղաքապետարանը ցանկացել է լուծել խնդիրը: Արդյունքում արտաքին հարդարման աշխատանքներ կատարելով։ Տանտերերը չեն համաձայնվել՝ համարելով, որ սա հիմնովին լուծում չէ ու նույնիսկ այդ աշխատանքները չեն իրականացվել։ Իսկ կամրջի շինարարության հետեւանքով վնասվել է նաեւ տան նկուղը: Որպես խնդրի լուծում բնակիչները տեսնում են տունն օտարելը: Ու որպեսզի պաշտոնյանները ուշադրություն դարձնեն, նրանք փակցրել են այս «Ապահովեք ընտանիքիս անվտանգությունը» գրությամբ պաստառը՝ ի տես 270 մ երկարությամբ ուղեանցով Երեւան ժամանողներին ։ Մանրամասները՝ տեսանյութում
