Տանը՝ ինչպես փողոցում. մրրիկի հետևանքները (տեսանյութ)
Էջմիածին քաղաքի Մաշտոցի 63 հասցեի բնակիչները տանը իրենց զգում են ինչպես փողոցում: Անձրևն ու մրրիկը պոկել են շենքի վերջերս նորոգված տանիքը:
«Երբ որ անձրևն եկավ, ցելաֆոն գցեցի այդ հատվածում, որ ջուրը նորից չլցվի տունը, խոնավության հոտն էլ արդեն խեղդում էր»,-«Ա1+»-ի հետ զրույցում նշեց այդ հասցեի բնակչուհի Օվսաննա Ավետիսյանը:
Ավետիսյաններն ապրում են բազմաբնակարան շենքի 5-րդ հարկում: Առաջինը նրանք են զգում քամու հետևանքները։ Նման իրավիճակում են հայտնվել մայիսի 23-ից և մինչ օրս խնդիրը լուծված չէ:
«Կռանթի նման ջուրը լցվում էր տունը, երկու-երեք վեդրոյից ավել ջուր եմ կրճել-թափել, պատերի էս ներկերն էլ այ էդ ջրերից լրիվ թափվել է»,-ասաց Օվսաննա Ավետիսյանը:
Տանիքների հետ կապված խնդիրը նոր չէ, Մաշտոցի 63–ն էլ միակ հասցեն չէ։ Էջմիածնի Չարենցի 4 շենքի տանիքն էլ թեև նորոգվել է երկու տարի առաջ, բայց վնասվել է։ Երկու դեպքում էլ շինարարական աշխատանքներն իրականացրել է «Խաչատրյան-բիզինգ» ՍՊԸ-ն։ Արմավիրի մարզպետարանի աշխատակազմի քաղաքաշինության վարչության պետ Կարինե Դանիելյանը հեռախոսով այսպիսի պարզաբանում տվեց.
«Համապատասխան գրությունը գնացել է տարածքային կառավարման նախարարություն, որտեղից պատասխան ենք ստացել, որ համապատասխան ֆինանսական միջոցների դեպքում այդ խնդիրը կլուծվի, սրանից ավել ես ձեզ ասելու ոչինչ չունեմ , դա իմ պարտականությունների մեջ չի մտնում»:
Էջմիածնի Կարճիկյան 1, Վռամ Կոստանյան 5 և 15-րդ մանկապարտեզի տանիքները ևս վնասվել են բնության տարերքից: Էջմիածնի քաղաքապետարանում այս մասին տեղյակ են: Այս հասցեներում քաղաքապետարանն իր բյուջետային գումարներով է նորոգումն իրականացնում, մինչդեռ Չարենցի 4 և Մաշտոցի 63 հասցեների հետ կապված խնդիրը ըստ քաղաքապետարանի ներկայացուցչի՝ բոլորովին այլ է:
«Այնտեղ անորակ աշխատանքներ են կատարվել, դրա հետ կապված համապատասխան գրավոր դիմումը ներկայացվել է մարզպետարան և քաղաքաշինության նախարարություն, որ դեֆեկտնի ակտը կազմվի և գան համապատասխան ընթացք տան՝ պարտադրեն այդ շինարարին, որ իր անորակ շինարարության հետևանքները գա վերացնի :
Էջմիածնի ընտրողներն են և մենք պետք է հետամուտ լինենք դրան»,-մեզ հետ զրույցում տեղեկացրեց Էջմիածնի քաղաքապետարանի լրատվական բաժնի ղեկավար Վարդան Վարդանյանը ու ավելացրեց. «Հիմա եթե ինչ-որ մի անբարեխղճի պատճառով մի տանիք անընդհատ վնասվում է, հո քաղաքապետարանը չի կարող անընդհատ իր միջոցներով հիմնանորոգի դա»:
Հարկ ենք համարում նշել նաև, որ «Խաչատրյան-բիզինգ» ընկերությունն առաջին անգամ չէ, որ շահել է մրցույթը։ «Խաչատրյան-բիզինգ» ՍՊԸ ներկայացուցիչներից ՝ ի դեմս ընկերության տնօրեն Աշոտ Խաչատրյանի՝ պարզաբանում ստանալ չհաջողվեց:
Դիտեք նաև տեսանյութը
