Տրանսպորտը կթանկանա ձմռա՞նը
Երեւանի ավագանու «Բարեւ Երեւան» խմբակցության անդամ Արմեն Մարտիրոսյանը կարծում է, որ իշխանությունները տրանսպորտի սակագինը կբարձրացնեն ձմռանը:
Խոսելով կուսակցության և քաղաքացիական հանրության գործողություններից` պարոն Մարտիրոսյանն ասաց. «Այս պահին այդ ուղղությամբ հաջողություններ չկան, բայց սա չի նշանակում, որ գործընթացը կանգնած է»:
«Պայքարը նոր է սկսվում, այն ժամանակավոր հաջողությունը, որ ունեցավ հասարակությունը, ես հույս ունեմ, որ հետագայում նույն դիրքերում դուրս կգա` անկախ եղանակային պայմաններից, որովհետև ինչքան հասկանում եմ` այդ որոշման հրապարակումը և իրականացումը իշխանությունները, երևի թե, թողել են ավելի ցուրտ ժամանակահատվածին, այսինքն` ձմռանն է դա սպասվում, որպեսզի բնության օգնությամբ երկարատև ակցիաներ չիրականանան»:
Հիշեցնենք, որ քաղաքային իշխանությունները տրանսպորտի սակագինը փորձեցին բարձրացնել ամռանը, սակայն հասարակական ճնշման եւ «Վճարում ենք 100 դրամ» ակցիաների արդյունքում ստիպված եղան կասեցնել որոշումը։
