Անգլիայում պահանջում են Բլատերի հրաժարականը
Անգլիայի պրոֆեսիոնալ ֆուտբոլիստների միության գործադիր տնօրեն Գորդոն Թեյլորը կարծում է, որ ՖԻՖԱ-ի նախագահ Զեպ Բլատերը պետք է հրաժարական տա եւ իր տեղը զիջի ՈՒԵՖԱ-ի նախագահ Միշել Պլատինիին:
Գորդոն Թեյլորին զայրացրել է ՖԻՖԱ-ի նախագահի վերջին հեռուստաելույթը, որի ժամանակ շվեյցարացին հայտարարել է, որ ֆուտբոլում չկա ռասսայական խտրականություն:
«Ֆուտբոլային խաղերին պատահում է, որ մի ֆուտբոլիստը խոսքով վիրավորում է մյուսին կամ անվայել ժեստ է ցույց տալիս, սակայն հանդիպման ավարտից հետո բոլորը միմյանց ձեռք են սեղմում: Դա հնարավոր դարձավ հենց մեր կողմից ռասիզմի դեմ տարվող աշխատանքի շնորհիվ» - նշել է Զեպ Բլատերը:
ՖԻՖԱ-ի նախագահի խոսքերը մեծ արձագանք են գտել Անգլիայում, քանի որ այդ երկրի ֆուտբոլի միությունը ներկայումս քննում է ռասիզմի հետ կապված երկու միջադեպ: Մասնավորապես, ԱՖՄ «Լիվերպուլի» ուրուգվայցի հարձակվող Լուիս Սուարեսին արդեն մեղադրանք է ներկայացրել` համարելով, որ նա ռասիստական արտահայտություններ է արել «Մանչեսթեր Յունայթեդի» ֆրանսիացի պաշտպան Պատրիս Էվրայի հասցեին:
