«Չնայած այն հանգամանքին, որ Վրաստանն այսօր զարգանում է, սակայն մոտ ապագայում բազում խնդիրների առաջ է կանգնելու ինչպես հարեւան երկրների հետ  հարաբերություններում, այնպես էլ միջազգային մակարդակում»,-ասում է  Գեորգի Ցիվցիվադձեն։  Ըստ նրա՝  հարեւան երկրների հարաբերություններում անհրաժեշտ է իրականացնել արմատական փոփոխություններ՝ ընդգծելով կովկասյան տարածաշրջանի նշանակությունը համաշխարհային տնտեսական և քաղաքական զարգացման համար։

«Վրաստանի Հանրապետության կառավարություն» անունով հանդես եկող խումբը ներկայացնում է հավակնոտ առաջարկներ, որոնցից մեկն էլ «Կովկասյան միության» ստեղծումն է, որն առաջատար դեր կխաղա Եվրոպան և Ասիան կապող տարանցիկ ուղիներում: Նա կարծում է, Վրաստանի ռազմավարական դիրքը այդ առանցքային է դարձնում փոխադարձ տնտեսական շահի համար:

«Կովկասյան միության ստեղծման համար անհրաժեշտ է մշակել պարզ և խիստ, հետևողական համաշխարհային քաղաքական ուղեգիծ, որը, անհրաժեշտության դեպքում, կգործի որպես Կովկասյան տան և աշխարհի պետությունների անվտանգության պաշտպանության մեխանիզմ»,-ասում է  Գեորգի Ցիվցիվադձեն։

Նրա խոսքով՝  բնականաբար, «Կովկասյան տան» ստեղծումը  չի նշանակում Վրաստանի արտաքին քաղաքականության մեկ ուղղությամբ զարգացում․  կարևոր է խորացնել հարաբերությունները Ամերիկայի Միացյալ Նահանգների, Եվրոպական միության, տարբեր միավորումների,  տարածաշրջանային  և  այլ երկրների հետ:

Ինչ վերաբերում է տարածաշրջանում առկա հակամարտություններին, ապա․ «Ազգային հողում առաջացող կոնֆլիկտների իրական պատճառների օբյեկտիվ ուսումնասիրությունը հրատապ խնդիր է, ինչը չի թույլատրի չար կայսերական ուժերին  մշտական բնույթ հաղորդել ազգամիջյան հակամարտություններին՝ հանուն իրենց շահերի»:

Գեորգի Ցիվցիվադձեն հայտնեց, որ իրենց առաջարկը ներկայացրել են  հրապարակավ, բայց հայաստանյան ուժերից արձագանք չեն ստացել։