Ալիևը կրկին «Զանգեզուրի միջանցքի» հարցն է բարձրացրել ու նախապայմաններ առաջ քաշել

Ադրբեջանի նախագահ Իլհամ Ալիևը տեղական հեռուստաընկերություններին տված հարցազրույցում կրկին բարձրացրել է «Զանգեզուրի միջանցքի» բացման ու դրա նկատմամբ վերահսկողության հարցը։

«Մարդիկ և բեռները Ադրբեջանից Ադրբեջան պետք է անցնեն առանց ստուգումների», «Եթե Հայաստանը չբացի «Զանգեզուրի միջանցքը», մենք էլ չենք բացի Հայաստանի հետ սահմանը՝ որևէ այլ վայրում»,-  սպառնացել է Ալիևը։

Նա նշել է, թե «Զանգեզուրի միջանցքը» չբացելով՝ Հայաստանը «կհայտնվի փակուղում»։

«Եթե ​​իմ նշած երթուղին («Զանգեզուրի միջանցքը») չբացվի, ապա մենք մտադիր չենք բացել Հայաստանի հետ սահմանը՝ որևէ այլ վայրում։ Այսինքն՝ այդպիսով նրանք միջանցքը չբացելուց ավելի շատ վնաս կստանան, քան օգուտ»,- ասել է Ալիևը։

«Մենք ոչ մի տեղ էլ չենք գնա, ոչ մի քայլ չենք անի ո՛չ 2021 թվականին զբաղեցրած դիրքերից, ոչ էլ 2022-ին զբաղեցրած դիրքերից»․ Ալիևը՝ զորքերի «հայելային հետքաշման» մասին

Ադրբեջանի նախագահ Իլհամ Ալիևը տեղական ԶԼՄ-ներին տված հարցազրույցում արձագանքել է զորքերի «հայելային հետքաշման» մասին Հայաստանի առաջարկին։ Ի պատասխան՝ նա նշել է, թե իրենց գրաված դիրքերից ու բարձունքներից «ոչ մի քայլ հետ չեն գնա»։

«Մենք ոչ մի տեղ էլ չենք գնա, ոչ մի քայլ չենք անի ո՛չ  2021 թվականի մայիսին զբաղեցրած դիրքերից, ոչ էլ 2022 թվականի սեպտեմբերին զբաղեցրած դիրքերից, որովհետև սահմանը պետք է սահմանվի։

Ադրբեջանից Հայաստանի պահանջներն անհիմն են, քանի որ «պայմանական սահմանի» տարածքում բնակավայրեր չկան։ Իսկ Հայաստանն «օկուպացված» է պահում «մեր գյուղերը», և դա անթույլատրելի է»,- հոխորտացել է Ալիևը։

Նա կրկին նշել է, որ հունվարին սահմանազատման հանձնաժողովների հանդիպում է նախատեսված։

«Դրա ընթացքում հստակություն կմտցվի այդ հարցում»,- ասել է Ալիևը