Հայաստանի Հանրապետությունը կանգնած է լուրջ հումանիտար խնդրի առջև։ Երկարաժամկետ ու հիմնական լուծում պետք է տա 150 հազար արցախցիների՝ Հայաստանում բնակեցնելու և տնտեսության մեջ ինտեգրելու խնդրին։ Այս մասին ֆբ-ի իր էջում գրառում է արել Արցախի Հանրապետության տարածքային կառավարման և ենթակառուցվածքների նախկին նախարար Հայկ Խանումյանը։

 

 

«Խոսքը նոր բնակֆոնդի կառուցման, ընտանեկան բիզնեսների ստեղծման ու տնտեսական տարբեր ծրագրերի ֆինանսավորման մասին է։ Այս ամենի մոտավոր արժեքը 5 միլիարդ դոլար է, որի կեսը կարող է լինել լիզինգի տեսքով (որոշակի ժամանակում շահառուների կողմից վերադարձելի գումար)։

 

Ի՞նչ պետք է անի ՀՀ կառավարությունն այս գումարը գտնելու համար։ Նորմալ ձևակերպի խնդիրը, ներկայացնի այն միջազգային կառույցներին և պետություններին՝ խնդրելով աջակցություն հումանիտար այս խնդրի լուծման համար։ ՀՀ կառավարությունը պետք է ինտենսիվ բանակցի միջազգային ֆինանսական կառույցների և կառավարությունների հետ՝ ՀՀ արտաքին պարտքը զիջելու համար։ Դա հնարավորություն կտա արտաքին պարտքի սպասարկման գումարն ուղղել այս խնդրի լուծմանը, հնարավորություն ունենալ պարտքով նոր գումարներ ներգրավել տրաբեր ծրագրերի համար։

 

Ի՞նչ չպետք է անի ՀՀ կառավարությունը։ ՀՀ կառավարությունը չպետք է հայտարարի, որ իրեն հաջողվել է լուծել արցախցիների խնդիրները, միակ պետությունն է, որ այսքան կարճ ժամանակահատվածում լուծել է ավելի քան 100 հազար մարդու տեղավորման հարց և այլն։

 

Էլի եմ կրկնում, արցախցիների Հայաստանում բնակեցման հարցի արժեքը 5 միլիարդ դոլարի սահմաններում է։ Կիսալուծումները բերելու են լուրջ արտագաղթի։ Պաշտոնական տվյալներով Հայաստանից օրական հեռանում է 100-ից ավելի արցախցի։ Արցախի կորուստը վերջին հարյուրամյակի հայության ամենամեծ կորուստն է, այդ կորուստն ավելի կմեծանա, եթե կորցնենք արցախցիներին»,- գրել է Խանումյանը։