Հոտնկայս գնահատեցին Վենգերովի արվեստը (տեսանյութ)
Հայաստանի պետական երիտասարդական սիմֆոնիկ նվագախմբի հրավերով առաջին անգամ Հայաստանում հանդես եկավ Գրեմմիի կրկնակի մրցանակակիր, համաշխարհային հռչակ վայելող ջութակահար և դիրիժոր Մաքսիմ Վենգերովը: Նրա ղեկավարությամբ` մեր երիտասարդ, բայց աշխարհում արդեն բարձր գնահատականի արժանացած նվագախումբը կատարեց Ռիմսկի-Կորսակովի և Սիբելիուսի ստեղծագործությունները:
Մաքսիմ Վենգերով-խմբավարի ղեկավարությամբ այսքան սպասված համերգի առաջին բաժնում Ռիմսկի-Կորսակովի Զատկի նախերգանքն ու Սիբելիուսի ջութակի կոնցերտը Հայաստանի երիտասարդական սիմֆոնիկ նվագախմբի ու մենակատար Յարոսլավ Նադրզիցկիի կատարմամբ, հնչեց որպես «նախուտեստ»:
Ծափահարություններ, շնորհակալ ու գոհունակ դեմքեր ու... սպասում: Ռիմսկի-Կորսակովի «Շեհերեզադե» սիմֆոնիկ սյուիտից հետո դահլիճը պոռթկաց ծափերից, և անհամբեր սպասեց արդեն ջութակահար-Վենգերովի ելույթին, որի մասին Գրեմմի-ի մրցանակակիրը խոստացել էր երևանյան ասուլիսի ժամանակ:
Ու երբ հնչեց Իոհան Սեբաստյան Բախի աստվածային երաժշտությունը այսօրինակ վարպետի կատարմամբ, դահլիճը ցնծաց ու խոնարհվեց կատարյալի առջև:
Հայ երաժշտասերը հոտնկայս պատվեց Մաքսիմ Վենգերովի բարձր արվեստն, և որպես քաղաքացի հպարտացավ մեծ վարպետության հասած իր երիտասարդ կատարողների ելույթով:
Համերգի ավարտին, ի պատասխան տեղատարափ ծափերի, բռավոների ու բիսերի հուզական աշխարհի ասպետը հնչեցրեց կրակոտ լեզգինկան Արամ Խաչատրյանի «Գայանե» բալետից:
Աշխարհի լեգենդար բեմերում ելույթներ ունեցած, համաշխարհային հռչակ ու սեր վայելող երաժիշտը անմիջական ու անկեղծ էր ոչ միայն իր հնչեցրած երաժշտական կտավներում, այլ և ջերմ գնահատականի խոսքում:
Լեփ-լեցուն դահլիճից կուլիսներ էր եկել երաժշտասերների ու երկրպագուների մի ստվար բանակ` իր հիացմունքն ու շնորհակալությունը հայտնելու ու լուսանկարվելու:
