Աշխարհաքաղաքական ոչ մի փոխդասավորություն, գերտերությունների միջև ոչ մի առևտուր կամ պայմանավորվածություն ի զորու չէ ետ տալ պատմության բնականոն ընթացքը և զրկել Արցախի ժողովրդին ազատ ապրելու աստվածային իրավունքից՝ անկախ պետականության շրջանակներում կամ որպես մայր հայրենիքի պետության մի մաս։

 

Արցախի ժողովրդի ինքնորոշման իրավունքն իրացվել է միջազգային իրավունքի նորմերի և ԽՍՀՄ օրենսդրության տառին համապատասխան՝ ստեղծելով անկախ պետություն։

 

Հայաստանի Հանրապետության որևէ իշխանություն իրավունք չունի Արցախի հակամարտության կարգավորման հարցում վարել այլ քաղաքականություն, քան այն, որը բխում է Արցախի ժողովրդի ինքնորոշման իրավունքի պահանջից։ Արցախյան շարժումը հայոց անկախ պետականության վերականգնման հիմքն ու սկիզբն էր. չլինի ազատ Արցախը, չի լինի և հայոց անկախ պետությունը։

 

Թեև Արցախն այսօր ապրում է իր պատմության հիրավի ամենածանր շրջանը, բայց մենք հավատում ենք հակամարտության խաղաղ կարգավորման հնարավորությանը՝ բացառապես հայկական պետությունների ռազմական ներուժի մեծացման, աճող տնտեսության, ազգային միասնության, հայրենասեր ու անկաշառ իշխանություններ ունենալու հանգամանքների հաշվառմամբ։