Արմեն Սարգսյանը շնորհավորական ուղերձ է հղել ԱՄԷ նորընտիր նախագահին
Աջակցիր «Ա1+»-ինՀանրապետության չորրորդ նախագահ Արմեն Սարգսյանը շնորհավորական ուղերձ է հղել Արաբական Միացյալ Էմիրությունների նորընտիր նախագահ, շեյխ Մուհամմեդ բին Զայեդ Ալ Նահյանին: Ուղերձում, մասնավորապես, ասվում է.
«Ձերդ Մեծություն շեյխ Մուհամմեդ բին Զայեդ Ալ Նահյան, Թանկագին բարեկամ, Ջերմորեն շնորհավորում և լավագույն բարեմաղթանքներս եմ հղում Ձեզ՝ Արաբական Միացյալ Էմիրությունների նախագահի բարձր պաշտոնում ընտրվելու առթիվ: Հայաստանի Հանրապետության և Արաբական Միացյալ Էմիրությունների միջպետական հարաբերություններն աչքի են ընկնում բարեկամական ու գործնական դրսևորումներով՝ խարսխված լինելով պատմական ամուր, հուսալի հիմքի վրա:
Համոզված եմ, որ Դուք շարունակելու եք ավելի զարգացնել մեր երկու երկրների և ժողովուրդների կապերը: Ջերմությամբ եմ հիշում մեր հանդիպումները, այդ թվում նաև՝ ԱՄԷ կատարած իմ պաշտոնական ու աշխատանքային այցերի շրջանակում, որոնց ընթացքում բազմիցս համոզվել եմ, որ ի դեմս Ձեզ, ԱՄԷ ժողովուրդն ունի հեռատես ու շրջահայաց պետական գործիչ՝ օժտված առաջնորդի ու հայրենասեր անհատի լավագույն որակներով:
Այդ հանդիպումների ժամանակ բազմաթիվ քննարկումներ ենք ունեցել հայ-էմիրաթական հարաբերությունների շուրջ, քննարկումներ, որոնք Ձեր աջակցությամբ շարունակաբար վերածվում են միջպետական գործնական նախագծերի: Ինքս պատրաստ եմ այսուհետ ևս ներդրում ունենալ մեր երկրների հարաբերությունների զարգացման մեջ:
Վստահ եմ, որ Ձեր ղեկավարման շրջանում բարեկամ ԱՄԷ-ն արձանագրելու է նոր ձեռքբերումներ և ամրապնդելու է իր ծանրակշիռ տեղն արաբական և իսլամական աշխարհում: Մաղթում եմ Ձեզ քաջառողջություն և հաջողություն, իսկ Արաբական Միացյալ Էմիրությունների բարեկամ ժողովրդին՝ հարատև խաղաղություն և բարեկեցություն»: