ԷԴԻԿ ԳՐԻԳՈՐՅԱՆՆ ԱՓՍՈՍՈՒՄ Է ԿՈՐՑՐԱԾԻ ՀԱՄԱՐ
Աջակցիր «Ա1+»-ինԱմբաստանյալ Էդիկ Գրիգորյանը դատարանին վերստին փորձում էր ապացուցել, որ մինչ ոճրագործությունը իր ներկայությամբ սպանությունների հարցը չի քննարկվել. «Սպանություններ նախատեսված չեն եղել, եւ ես դրանց մասին չեի կարող տեղյակ լինել»:
Նրա տրամաբանությամբ, ինքը չէր կարող ունենալ ակտիվ դեր «27»-ի ոճրագործության «մտահղացումը ծնելու եւ իրականացնելու մեջ», քանի որ «մտահղացումը ծնվում է մեկ մարդու գլխում եւ դա Նաիրի Հունանյան էր»:
Էդիկ Գրիգորյանը անհիմն որակեց այն մեղադրանքը, որ ինքը Դերենիկ Բեջանյանին ներգրավել է այդ գործում:
Իսկ ինչու՞ ինքը, տեսնելով ԱԺ-ում կատարվածը, զենքը վայր չի նետել, չի կրակել Նաիրի Հունանյանի վրա: Այս հարցին ամբաստանյալը պատասխանեց. «Պետք էր այնտեղ լինել պատկերացնելու համար»:
Էդիկ Գրիգորյանը կարծում է, որ ինքը ԱԺ նիստերի դահլիճում կազմակերպված է գործել, որպեսզի «սպանվածների թիվը չավելանա»:
«Տուժողներից ոչ մեկն ինձանից չի դժգոհել», - հայտարարում է ահաբեկչություն կատարելու մեջ մեղադրվող բժիշկը:
Իր պաշտպանական ճառում Էդիկ Գրիգորյանը հարկ համարեց անդրադառնալ նաեւ փաստաբան Աշոտ Սարգսյանի այն հայտարարությանը, որ իբր նա խաբված է. «Առողջապահության նախարարի աթոռի փոխարեն նստած է ամբաստանյալի աթոռին»: Բժիշկ ամբաստանյալն ուներ իր քաղաքական բացատրությունը. «Թույլ տնտեսություն ունեցող մեր երկրի համար առողջապահության նախարարությունը ճոխություն է»:
Սակայն Էդիկ Գրիգորյանը չթաքցրեց, որ ինչ-որ բաների համար ափսոսում է, օրինակ` «իր երեխաների կորցրածի համար»:
Իդեպ, նա բացառում է այլ մարդկանց մասնակցությունն «27-ի» ոճրագործությանը, քանի որ ինքը վարձու զինվոր չէ:
