«Եվրոպայում ԵԽ-ին ուշադրություն չեն դարձնում» (տեսանյութ)

Աջակցիր «Ա1+»-ին

ԵԽԽՎ աշնանային նստաշրջանից վերադարձած ԵԽԽՎ-ում հայկական պատվիրակության ղեկավար Դավիթ Հարությունյանը պատասխանեց Ա1+-ի հարցերին:

-Պարոն Հարությունյան, ե՞րբ կնշանակվի Հայաստանի հարցով համազեկուցող:

-Համազեկուցող կնշանակվի այ ժամանակ, երբ պարոն Լինդբլադի լիազորությունները իրենց պատվիրակության կազմում դադարեն, կամ նա գտնվի այնքան խոհեմ, որ հրաժարվի եւ հնարավորություն ընձեռի շարունակել մոնիտորինգի բնականոն գործընթացը:

-Դուք հիշատակեցիք Գորան Լինդբլադի անունը, նա անձամբ ձեզ նամակ էր հղել, դուք նրան պատասխանե՞լ եք գրավոր, բանավոր, եւ ինչպիսի՞ն է ձեր գնահատականը այդ նամակին:

-Ընդհանրապես շվեդ-թուրքական բարեկամական խմբի ղեկավար Լինդբլադի նամակին, անշուշտ, ծանոթ եմ, նամակին պատասխանեց մոնիտորինգի հանձնաժողովը, փակ քննարկման ժամանակ` հետաձգելով համազեկուցողների այցը Հայաստան: Իսկ իմ պարագայում ձեռնպահ կմնամ գնահատականներից,եւ փոխելով հայտնի ասացվածքը` ասեմ` չընտրված պատգամավորի մասին կամ լավը, կամ ոչինչ:

-Հայ-ադրբեջանական պատվիրակների հանդիպման ժամանակ ԼՂՀ հարցով ժամանակավոր հանձնաժողով ստեղծելու վերաբերյալ համաձայնություն ձեռք չբերվեց:

- Ժամանակավոր հանձնաժողով վերստեղծելու մասին խոսք գնում էր, մեր դիրքորոշումներն այդ հարցում բացարձակապես տարբերվում են միմյանցից, ինչպես նաեւ այն հարցում, թե ինչ կարող է անել այդ հանձնաժողովը: Համաձայնություն ձեռք չբերվեց, բայց քննարկումները շարունակվում են:

-Այլ հարցեր քննարկվեցի՞ն հանդիպման ընթացքում:

-Իսկ հայ-ադրբեջանական պատվիրակությունների հանդիպման օրակարգի մյուս հարցը հնարավոր համագործակցության եղանակներին էր վերաբերում, որպեսզի կարողանանք ավելի կոնստրուկտիվ հենքի վրա հարաբերվել:

-Մոնիտորինգի հանձնաժողովի համար որքանո՞վ էին համոզիչ իշխանության փաստարկներն ու ընդդիմության ելույթները:

-Խնդիրը համոզիչ լինելու մասին չէ: Ի սկզբանե մենք կողմնակից ենք եղել այդ լսումներին. սա նոր ֆորմատ է մոնիտորինգի համար եւ քանի որ մեր քաղաքական դաշտը շատ ավելի լայն է, քան մենք հնարավորություն ունենք ներկայացնելու մոնիտորինգի հանձնաժողովի նիստում, մենք ինքներս կողմնակից էինք, որ եւ իշխանության տարբեր ուժերը ներկայացված լինեն, եւ ընդդիմությունը,ընդ որում` ոչ միայն խորհրդարանական, այլեւ արտախորհրդարանական ընդդիմությունը: Ընդհանուր առմամբ, բոլորը ներկայացրին իրենց դիրքորոշումը եւ սա ընդամենը տեղեկատվություն էր, որ ներկայացրին տարբեր ուժեր: Իսկ եզրակացություն մոնիտորինգի հանձնաժողովը չի կարող անել լսելով մեկին կամ մյուսին, ի վերջո հիմքը խոսքի ճարտարությունը չէ, սա նյութ է, որը պետք է հաշվի առնի մոնիտորինգի հանձնաժողովը, երբ համազեկուցողները այցելեն երկիր, ուսումնասիրեն հարցերը եւ ներկայացնեն իրենց զեկույցը հանձնաժողովին:

-Համազեկուցողները ե՞րբ կայցելեն Հայաստան:

-Կարծում եմ դեկտեմբերին, հունվարին:

-Դուք եւ մեր պատվիրակությունը չստորագրեցիք «Հեռուստատեսության եւ ռադիոյի մասին» օրենքում փոփոխությունների արդյունքում ստեղծված իրավիճակի առնչությամբ Զարուհի Փոստանջյանի տարածած բանաձեւի տակ: Ինչո՞ւ: Համաձայն չէիք գաղափարի՞ն, թե՞ ձեւակերպումներ կային անընդունելի:

-Գաղափարին համաձայն եմ, ավելին, կողմնակից եմ, որ այդ օրենքը փոփոխվի եւ տեսնում եմ լուրջ փոփոխությունների հնարավորություն: Սակայն յուրաքանչյուր բանաձեւ ունի գաղտնիք, կարող է լինել մեկ բառ, որի պատճառով դու պատրաստ չես լինում ստորագրել բանաձեւը: Նման ձեւակերպումներ կային այդ բանաձեւում, եւ ես պատրաստ չէի ստորագրելու:

-ԵԽԽՎ ադրբեջանցի պատգամավոր Գանիրա Փաշաեւան տարածեց բանաձեւ` իրենց դիվերսանտների դիակները վերադարձնելու պահանջով, եւ դրան զուգահեռ Ադրբեջանի բանտում սպանվեց հայ գերին: Ինչպե՞ս եք երեւույթը գնահատում: Պատահական համընկնո՞ւմ էր, թե՞ դիտավորություն, ինչ-որ բան ակնարկելու ձգտում:

-Քաղաքականության մեջ պատահականություններ չեն լինում: Ինչ վերաբերում է գնահատականին, կարծում եմ այդ երևույթը երկրագնդի ցանկացած բնակչի համար ունի մեկ գնահատական` դատապարտում: Շատ ցավում եմ, որ նման երեւույթներ դեռ կարող են տեղի ունենալ, ցավում եմ նաեւ, որ ԵԽԽՎ-ում գտնվում են պատգամավորներ, որոնք պատրաստ չեն լինում ստորագրելու այն բանաձեւի տակ, որ պատրաստել էր Զարուհի Փոստանջյանը: Դա արդեն խոսում է ԵԽԽՎ կազմի եւ տարբեր շահերի մասին: Մեր երկրներում, որոնք գտնվում են մոնիտորինգի տակ, ԵԽ-ն շատ ավելի հայտնի կառույց է, քան բուն Եվրոպայում: Այնտեղ մարդիկ այդ կառույցին ուշադրություն չեն դարձնում: Եվ մարդիկ, որոնք չեն կարողանում իրենց դրսեւորել ակտիվ քաղաքականության մեջ, ընտրում են այս ճանապարհը: Դա չի նշանակում, որ ԵԽ-ում մենք չունենք հայտնի քաղաքական գործիչներ, անշուշտ ունենք, ունենք շատ հայտնի, պարկեշտ անձնավորություններ, բայց, ցավոք սրտի, ունենք նաեւ մարդիկ, որոնք ղեկավարվում են բացարձակապես այլ շահերով:

Զրուցեց Դիանա Մարկոսյանը