Ինչ է տեղի ունեցել Կենդանաբանական այգում․ Քաղաքապետարանի որոշումը հարցեր է առաջացրել
Աջակցիր «Ա1+»-ինԵրևանի քաղաքապետարանի ներկայացուցիչներն այսօր Կենդանաբանական այգու աշխատակիցներին են ներկայացրել այգու տնօրենի նոր ժամանակավոր պաշտոնակատարին՝ Արեւիկ Մկրտչյանին։
Մեր տեղեկություններով՝ աշխատակիցների մի մասը դեմ է քաղաքապետարանի որոշմանը եւ իրենց բողոքն արտահայտել են՝ բոյկոտելով հանդիպումը և լքելով սրահը:
Նրանց զարմացնում է, որ քաղաքապետարանում որոշել են փոխել գործող ժ/պ-ին եւ նշանակել Արեւիկ Մկրտչյանին։ Վերջինս աշխատել է այգում, որպես միջազգային կապերի պատասխանատու եւ ըստ աշխատակիցների՝ ազատվել է՝անհարգելի պատճառով աշխատանքի չներկայանալու հիմքով:
Ա1+-ը փորձեց տեղեկությունը ճշտել Երեւանի քաղաքապետի մամուլի քարտուղար Հակոբ Կարապետյանից։ Ըստ նրա՝ այդ բոյկոտ չէր, պարզապես աշխատակիցների մի փոքր մասը հայտնել է իր կարծիքը։
Խոսնակի տեղեկացմամբ՝ տնօրենի ժամանակավոր պաշտոնակատար Վլադիմիր Սիմոնյանը փոխարինվել է, քանի որ աշխատանքը չէր համապատասխանում անհրաժեշտ պահանջներին, իսկ նոր ժ/պ-ն կպաշտոնավարի մինչեւ տնօրենի ընտրության մրցույթը։