ՀՀ Ոստիկանության պարեկային ծառայությունը Շիրակի և Լոռու մարզերում իր ծառայությունը կսկսի 8-9 ամիս անց, սակայն մինչ այդ արդեն պարեկային ծառայողի 570 տեղի համար մրցույթ է հայտարարվել։ Ասուլիսում այս մասին ասաց Արդարադատության նախարարության միջազգային իրավական համագործակցության համակարգող-խորհրդական Ամալյա Հովսեփյանը։

Նա նշեց, որ Լոռու մարզի համար 257, Շիրակի համար 258 հաստիքներ են նախատեսվում, ևս 55-ը կավելանան Երևանի պարեկային ծառայությանը՝ որպես համալրում։

«Այսօրվանից արդեն դիմորդները և ցանկացողները կարող են իրենց փաստաթղթերի փաթեթը ներկայացնել ՀՀ Ոստիկանության կրթահամալիր՝ նախօրոք գրանցվելով և ներկայացնելով այն ամբողջ փաստաթղթերը, որ հայտարարությամբ նախատեսված է։ Ինչպես նախորդ անգամ, այնպես էլ հիմա մրցույթով կան սահմանված որոշակի չափանիշներ թե՛ ներկայիս ծառայողների, թե՛ քաղաքացիական անձանց համար, ինչպես նաև որոշակի քվոտավորում իգական և արական սեռի ներկայացուցիչների համար», - ասաց Ամալյա Հովսեփյանը։

Մրցութային փուլն ավարտվելու է այս թվականի հոկտեմբերին, նշեց նա, և բոլոր ընտրված 570 դիմորդները ՀՀ Ոստիկանության կրթահամալիրում նոյեմբերից կանցնեն կրթության։

Ոստիկանության կրթահամալիրի պետի առաջին տեղակալ Միսակ Մարկոսյանը նշեց, որ այս անգամ ևս դիմորդների մեծ թվաքանակ են սպասում։ Քաղաքացիական անձանց համար պայմանները հետևալն է՝ կարող են դիմել 18-35 տարեկան ՀՀ քաղաքացիները, որ ունեն առնվազն միջնակարգ ընդհանուր կրթություն։

«Ընդունելության քննությունները լինելու են երեք փուլով՝ ֆիզիկական պատրաստվածության ստուգում, ընդհանուր զարգացվածության և մասնագիտական պիտանելիության ստուգում համակարգչային թեստավորման եղանակով, ինչպես նաև հարցազրույց, որի ընթացքում ստուգվելու է դիմորդների հոգեբանական նկարագիրը և նրանց արժեքային կողմնորոշումները», - ասաց Միսակ Մարկոսյանը։

Հայաստանի ոստիկանության պարեկային ծառայության պետ Արթուր Ումրշատյանն էլ հայտնեց, որ ամենացածր վարձատրվող պարեկը մոտավորապես ստանալու է 230 հազար դրամ և ըստ իրենց զբաղեցրած պաշտոնների աշխատավարձը կբարձրանա։