Հրաժարվում են տուրիստական փաթեթներից, երբ պատվաստվելու պարտադիր պահանջ է լինում (տեսանյութ)
Աջակցիր «Ա1+»-ինԼիբանանահայ Ալինան արդեն 5-րդ անգամ արձակուրդն անցկացնում է Հայաստանում, ասում է՝ դոլար օգտագործելու համար էժան է այստեղ, բայց եթե մարդն ապրի և դրամ օգտագործի, դժվար է ապրելը։
Այն, ինչ ասում է զբոսաշրջիկը, հաստատում են զբոսաշրջային գործակալություններում, հայաստանցիները նախընտրում են արձակուրդներն անցկացնել Եգիպտոսում, քան՝ Հայաստանում։
Պատճառը Հայաստանում առաջարկված բարձր և Եգիպտոսի՝ ցածր ու ամբողջական փաթեթներով արժեքներն են, նշում է «Rima Travel» տուրիստական գործակալության հիմնադիր տնօրեն Ռիմա Խաչատրյանը։
Ի տարբերություն նախորդ տարիների՝ այս տարի պահանջարկ չունի վրացական ծովափը։ Ըստ գործակալների՝ 90%-ը հրաժարվում է Վրաստան գնալուց ու պակասել են անգամ հարցումների թվերը։
Գլխավոր պատճառը քովիդի թեստերն են, որոնց համար մոտ 100 դոլար հավելյալ գումար պետք է վճարել
«Շատ քաղաքացիներ խուսափում են պատվաստումից եւ հրաժարվում են անգամ չվերթից։ Շատ քաղաքացիներ անգամ դիմում են մեզ եւ ասում են՝ եթե պատվաստում լինի, ապա պետք է մեր փաթեթը չեղարկենք։ Անգամ վաճառված փաթեթները պետք է չեղարկենք», - ասաց Ռիմա Խաչատրյանը։
Հայաստանում օրեցոր ավելանում են զբոսաշրջիկները։ Մեծ է Ռուսաստանից եկողների թիվը․
«Կա որոշակի տեղեկություն, որ եվրոպական երկրներում, օրինակ՝ Գերմանիայում, Հայաստանը քովիդի վտանգավոր երկրների ցանկից իջել է արդեն ոչ ռիսկային երկրների ցանկ», - ասաց «Armenia Travel» ընկերության զարգացման և տեխնոլոգիաների գծով տնօրեն Արմեն Գրիգորյանը։
Նշենք, որ այսօրվանից՝ հուլիսի 1-ից, ԵՄ անդամ պետությունները բացում են սահմանները Հայաստանի քաղաքացիների համար: Սա ենթադրում է, որ նաեւ կավելանան դեպի Հայաստան չվերթները։
Բայց, ըստ մասնագետների, շատ դժվար կլինի հասնել այն թվին, որը կար մինչեւ համավարակը եւ պատերազմը։
2019թ Հայաստան է այցելել 1.894.377 զբոսաշրջիկ։ 2020 թվականին Հայաստան զբոսաշրջային այցելությունները կազմել են ընդամեն 375 216, նվազումը՝ նախորդ տարվա նույն ժամանակահատվածի համեմատ, կազմել է շուրջ 80 %: