Ձյուդոյիստ Ֆերդինանդ Կարապետյանը լավ շանս ունի մեկնելու օլիմպիական խաղերի
Աջակցիր «Ա1+»-ինՀայաստանի առաջատար ձյուդոյիստ Ֆերդինանդ Կարապետյանը օլիմպիական վարկանիշային աղյուսակում այժմ զբաղեցնում է 32-րդ տեղը:
Ինչպես տեղեկացնում է Հայաստանի ազգային օլիմպիական կոմիտեի մամուլի ծառայությունը, դա մեր մարզիկին հնարավորություն է տվել ստանալ աշխարհամասային (Եվրոպայի) արտոնագիր, այսինքն, բավականին մեծացել է հայ մարզիկի հնարավորությունն առաջիկա օլիմպիական խաղերին մասնակցելու համար:
Վարկանիշային վերջին մրցաշարը տեղի կունենա հունիսի 6–13-ը Բուդապեշտում կայանալիք ձյուդոյի աշխարհի առաջնության ընթացքում։ Դրանից հետո յուրաքանչյուր քաշային կարգում կորոշվեն լավագույն 26 մարզիկ-մարզուհիները, որոնք կմասնակցեն Տոկիոյի խաղերին։ Ձյուդոյիստ օլիմպիականների վերջնական ցուցակները կհրապարակվեն հունիսի 28–ին:
Ֆերդինանդ Կարապետյանը մայիսի 20–ին ՀՀ հավաքականի կազմում կմեկնի Վլադիկավկազ, որտեղ կանցկացնի ուսումնամարզական հավաք։ Հունիսի 3–ին նա գլխավոր մարզիչ Հովհաննես Դավթյանի հետ կուղևորվի Հունգարիայի մայրաքաղաք:
