Հադրութի շրջանի բնակիչները և «Հանուն Հադրութի» ՀԿ-ի ներկայացուցիչները ՀՀ Արտաքին գործերի նախարարության մոտ ակցիա էին իրականացնում Ռուսաստանի Արտաքին գործերի նախարար Սերգեյ Լավրովի այցին ընդառաջ։

Հասարակական կազմակերպության ղեկավար Լևոն Հայրյանը նշեց, որ իրենց հիմնական պահանջը Հադրութի ու Արցախի մնացած տարածքների վերադարձման հարցն է։

«Ռուսները հայտարարում են, որ Արցախը Ադրբեջան է, Ֆրանսիան, ԱՄՆ-ն հույս են տալիս, որ կարող է բանակցային գործընթաց սկսեն, քննարկեն։ Բոլորը հետաքրքրվում են Ղարաբաղով, բացի Հայաստանի և Արցախի իշխանություններից։ Մեկը չկա այս ազգի մեջ քաղաքական գործիչ, որ վեր կենա, ասի՝ Արցախը Ադրբեջան չի, պարոն ռուսներ, չի եղել և չի լինելու։ Վախենում են ռուսներից։ Մենք եկել ենք այստեղ Լավրովին հասկացնելու, որ չենք վախենում ձեզնից, մեր հարցը լուծեք», - ասաց Հայրյանը։

Ամիսներ առաջ, նրա խոսքով, Սարուշեն գյուղի բնակիչներից մեկին ադրբեջանցիները կրակել էին, գյուղացիները բողոքել էին խաղաղապահներին, նրանք էլ, ադրբեջանցիների հետ խոսելուց հետո, ասել էին, որ նրանք ռուսերեն չգիտեն, չենք կարող հասկացնել, որ չկրակեն․

«Խաղաղապահը, որ եկել է այնտեղ, պետք է իմանա հայերեն, ռուսերեն, թուրքերեն, անգլերեն։ Դրա փոխարեն ասում են՝ ռուսերենը Արցախում դարձնենք պետական լեզու, որ խաղաղապահները խոսեն», - ասաց Հայրյանը։

Նրա խոսքով՝ իրենք ուզում են վերադառնալ իրենց հայրենիք՝ Հադրութ, և չեն ուզում այլ տեղ ապրել ո՛չ Հայաստանում, ո՛չ էլ Արցախում՝ բացի Հադրութից։ Իրենց առաջարկում են վերաբնակեցնել Արցախի այլ մասերում, բայց եթե իրենց տանեն այլ տեղ՝ դրանով Հադրութը մոռացության կտրվի։

 «Արցախի իշխանություններն էլ 30 տարի եղել են Երևանի իշխանությունների կամակատարը։ Ես չեմ տեսել Արցախում իշխանություն, որ երբևէ արել է քայլ առանց Երևանի իշխանության։ Ես 2000-2005 թթ․ Արցախում պատգամավոր եմ եղել, առաջարկում էի ինչ-որ մի բան անել, ասում էին՝ թող, տեսնենք Երևանն ի՞նչ ա ասում»,- ասաց նա։

Հադրութցիները նամակ հանձնեցին ԱԳՆ, որում ցանկություն էին հայտնում հանդիպել ԱԳ նախարարի պաշտոնակատար Արա Այվազյանի հետ և ներկայացնել, որ ամեն ինչ պետք է անել՝ Հադրութը վերադարձնելու համար, քանի որ եթե չկա Հադրութը, Ղարաբաղը, որ կարող է ադրբեջանցի հրոսակների հարվածներն իր վրա վերցնել, այդ հարվածները գալու են ուղիղ Երևան և Սյունիքն էլ չի կարողանալու դիմադրել․

«Այսինքն, Հադրութը վերականգնում ենք ոչ թե Հադրութ վերադառնալու համար, այլ Հադրութը, Քաշաթաղը, Քարվաճառը պետք է վերականգնվի՝ Հայաստանի անվտանգությունն ապահովելու համար», - ասաց Լևոն Հայրյանը։

Եթե Արցախին ստատուս չտրվի կա՛մ Հայաստանի կազմում, կա՛մ անկախ, այնտեղ հայ չի մնալու, ասաց Հայրյանը և հավելեց՝ եթե նույնիսկ պատերազմի արդյունքում Քուռ-Արաքս գետերի արանքն էլ գրավեինք ու մնայինք առանց ստատուսի, Արցախում հայ չէր մնալու․

«30 տարի վիճում ենք՝ Ռոբերտն ա լավ, Սերժն ա լավ, Նիկոլն ա լավ։ Որևէ մեկը չգտնվեց, որ ճանաչի Արցախի անկախությունը։ Ուրեմն ո՛չ Լևոնն էր լավ, ո՛չ Ռոբերտն ու Սերժը, ո՛չ էլ, առավել ևս, Նիկոլը», - ասաց նա։

Հադրութցիները որոշ ժամանակ առաջ քայլերթով գնացել էին նաև ԱՄՆ դեսպանատան մոտ ու նամակ հանձնել։ Տեղեկացրել էին, որ համավարակի պատճառով չեն կարող ընդունել։ Հայրյանը նշեց, որ երեկ իր հետ կապվել են դեսպանատնից ու ասել, որ քաղաքական հարցերով աշխատակիցները ցանկանում են օնլայն հանդիպել և քննարկել խնդիրները։ Դեպքերի այս զարգացումը նա կապում է ԱՄՆ նախագահ Ջո Բայդենի՝ Հայոց ցեղասպանությունը ճանաչելու հետ։