Նման կերպ ճնշել Սահմանադրական դատարանին, մատ թափ տալ ՍԴ-ի վրա․ սա զարմանալի է, նույնիսկ զարհուրելի է․ Վարդևանյան (տեսանյութ)
Աջակցիր «Ա1+»-ինԵթե Սահմանադրական դատարանը որոշի, որ 300․1 հոդվածը չի համապատասխանում Սահմանադրությանը, ինչն ակնհայտ է, 300,1 հոդվածով քրեական հետապնդումը Ռոբերտ Քոչարյանի նկատմամբ դադարեցվելու է։ Այս մասին ՍԴ-ում լրագրողների հետ զրույցում ասաց Ռոբերտ Քոչարյանի փաստաբան Արամ Վարդևանյանը։
Հիշեցնենք՝ Սահմանադրական դատարանում այսօր մեկնարկել է ՀՀ երկրորդ նախագահ Ռոբերտ Քոչարյանի և Երևան քաղաքի ընդհանուր իրավասության դատարանի դիմումների հիման վրա ՀՀ քրեական օրենսգրքի 300․1 հոդվածի սահմանադրականության հարցի քննությունը։
Վարդևանյանը նշեց, որ Ազգային ժողովը հինգշաբթի օրը ներկայացրել է թուղթ, որտեղ չէր անդրադարձել իրենց կողմից բարձրացված հիմնավորումներին։
Փաստաբանը նաև հայտարարեց՝ ՍԴ դատավոր Վահե Գրիգորյանի հետ ուղղակի փոխկապակցաված Տիգրան Եգորյանը ֆեյսբուքյան գրառմամբ փորձել է ճնշում գործադրել Սահմանադրական դատարանի դատավորների վրա․
«Նման կերպ ճնշել Սահմանադրական դատարանին, մատ թափ տալ ՍԴ-ի վրա․ սա զարմանալի է, նույնիսկ զարհուրելի է»։
Ինչ վերաբերում է Հրայր Թովմասյանի և Արևիկ Պետրոսյանի ներկայացրած միջնորդությանը՝ գործը քննել բանավոր ընթացակագով, Վարդևանյանն ասաց՝ միջնորդությունն ավելի քան հիմնավոր էր, ավելին՝ մի քանի օր առաջ ինքը ևս նման միջնորդություն ներկայացրել էր , իսկ արդյունքը կրկին եղել է 4 կողմ, 4 դեմ։
Ըստ փաստաբանի՝ սա հանրային հնչեղություն ունեցող գործ է, որի քննությունը պետք է անցներ բանավոր ընթացակարգով։
Վարդևանյանը պարզաբանեց՝ 300․1 հոդվածում առկա է որոշակիության դեֆիցիտ, գործ ունենք մի հոդվածի հետ, որի ձևակերպումը հստակ և հասկանալի չէ։
