Ազգային ժողովրդավարական բևեռի ներկայացուցիչները ՀՀ-ում Ֆրանսիայի դեսպանատան դիմաց  էին։   Նրանք նամակ էին  գրել Ֆրանսիական Հանրապետության Նախագահ պարոն Էմանուել Մակրոնին։

Նամակումն ներկայացված էր Հայաստանում տիրող իրավիճակը պատերազմից հետո, մարդկանց ունեցած դժվարություններն ու նաև կոչ և խնդրանք՝ օգնելու և աջակցելու, ինչպես նշված էր, Ֆրանսիայի դարավոր բարեկամ Հայաստանին։

Նամակները հայերեն և ֆրանսերեն էին և մինչ հանձնելը ներկայացուցիչներից Սարգիս Էգինյանն ընթերցեց ֆրանսերեն տարբերակը, Տիգրան Խզմալյանը՝ հայերեն։

«Ազգային ժողովրդավարական բևեռը դիմում  է Ֆրանսիային՝ իրականացնելու մարդասիրական միջամտություն, տրամադրելու մեր երկրին համակողմանի ռազմական և ռազմատեխնիկական աջակցություն, ինչպես նաև՝ օգտագործելու իր աջակցությունը Թուրքիային և Ադրբեջանին զսպելու համար։

Ազգային ժողովրդավարական բևեռը համարում է, որ 2020թ․ նոյեմբերի 9-ի հայտարարությունը սոսկ զինադադարի և հումանիտար հարցերի լուծման փաստաթուղթ է, ուստի խնդրում է Ֆրանսիային օգնել վերադարձնելու արցախյան հիմնախնդրի քննարկումը և լուծումը Մինսկի խմբի ձևաչափ՝ օրակարգում դնելով Արցախի կարգավիճակի և այնտեղ միջազգային խաղաղապահներ տեղակայելու հարցերը», - ասված էր նամակում։

Ֆրանսիայի դեսպանատնից ներկայացուցիչ դուրս եկավ և  ընդունեց նամակները։

Տիգրան Խզմալյանը նշեց, որ նորմալ պետականություն ունեցող երկրներում նման հարցերը լուծվում են կառավարությունների միջև, սակայն Հայաստանի ներկայիս կառավարությունն ու ընդդիմությունը շարունակում են սպասարկել պարտվողական, հակապետական, հակահայկական ռուս-թուրքական դաշինքի շահերը․

«Այդ պատճառով մենք մեզ վրա ենք վերցնում խոսելու մեր պատմական բարեկամների, մեր իրական դաշնակիցների հետ հայ ժողովրդի անունից։ Մենք մեզ այդ իրավունքը վերապահում ենք, որովհետև Հայաստանում այսօր, ցավոք սրտի, չկա կազմակերպված մեկ այլ ուժ, որ դնի աշխարհի առջև հայոց պետականության, ազգային արժանապատվության և ժողովրդի պաշտպանության խնդիրը», - ասաց Խզմալյանը։

Նա նշեց՝ վստահ են, որ Ֆրանսիան, ինչպես նաև Եվրամիության այլ երկրներն ու Միացյալ նահանգները կօգնեն մեր երկրին այնպես, ինչպես օգնել են հարյուր տարի առաջ և 90-ական թվականներին։

Ֆրանսիայի դեսպանատանը նամակ հանձնելով այս ակցիաները չեն ավարտվում։ Տիգրան Խզմալյանն ասաց, որ մարտի 16-ին մեծ երթով այցելելու են Ռուսաստանի դեսպանատուն և հանձնելու են իրենց նամակը, ինչպես նաև քննադատելու և դատապարտելու են 1921թ․ Մոսկվայի ռուս-թուրքական պայմանագիրը։ Նա նշեց, որ խորհրդանշական գործողություն են պատրաստվում իրականացնել, սակայն մանրամասներ չներկայացրեց։ Մարտի 17-ին էլ նամակ կհանձնեն ԱՄՆ-ի դեսպանատանը։