Այսօր Եվրոպայում կմեկնարկի ֆուտբոլի յուրահատուկ մարաթոն

Այսօր և վաղը կկայանան ֆուտբոլի Եվրոպայի լիգայի 1/8 եզրափակիչ փուլից հետաձգված հանդիպումները, իսկ օգոստոսի 7-ին և 8-ին տեղի կունենան արդեն չեմպիոնների լիգայի նույն փուլից մնացած չորս խաղերը: Մեկ օր ընդմիջումից հետո կմեկնարկեն քառորդ եզրափակիչ խաղերը, ապա միանգամից կկայանան կիսաեզրափակիչները: Օգոստոսի 21-ին և օգոստոսի 23-ին տեղի կունենան արդեն եզրափակիչները: 

Այդպիսով, 19 օրվա ընթացքում կանցկացվի 26 հանդիպում: Եվրոպական ֆուտբոլի օգոստոսյան այս մարաթոնը պայմանավորված է կորոնավիրուսի հետ, քանի որ դրա պատճառով են մարտ ամսին հետաձգվել բոլոր այդ խաղերը:

Նշենք, որ Եվրոպայի լիգայի գավաթի համար պայքար մղում են 16 թիմ: Դրանց թվում է նաև Հռոմի «Ռոման», որի կազմում հանդես է գալիս Հայաստանի հավաքականի ավագ Հենրիխ Մխիթարյանը: Իտալական ակումբը վաղը կհանդիպի իսպանական «Սևիլյայի» հետ: Այս զույգի հաղթողը քառորդ եզրափակիչում ուժերը կչափի «Օլիմպիակոս» - «Վուլվերհեմփթոն» խաղի հաղթողի հետ:

Չեմպիոնների լիգայում պայքարը շարունակում են 12 թիմ, քանի որ դրանից չորսն արդեն մտել են քառորդ եզրափակիչ: Առաջիկա հանդիպումներից հատկապես մեծ հետաքրքրություն են առաջացրել «Մանչեսթեր Սիթի» - «Ռեալ» և «Բարսելոնա» - «Նապոլի» հակամարտությունները:

Ավաղ, չեմպիոնների և Եվրոպայի լիգայի փլեյ-օֆֆի բոլոր հանդիպումներն անցնելու են առանց հանդիսականների, ինչը կամա թե ակամա անդրադառնում է ֆուտբոլիստների խաղի վրա: Հուսանք, որ թիմերը կհաղթահարեն հոգեբանական այդ խնդիրը և կցուցադրեն իրենց ողջ կարողությունները:

Առաջիկա չորս օրվա խաղերը

5 օգոստոսի

«Կոպենհագեն» - «Բաշակշեխիր»

«Շախտյոր» (Դոնեցկ) - «Վոլֆսբուրգ»

«Ինտեր» (Միլան) - «Խետաֆե»

«Մանչեսթեր Յունայթեդ» - ԼԱՍԿ «Լինց»

6 օգոստոսի

«Բայեր» - «Ռեյնջերս»

«Սևիլյա» - «Ռոմա»

«Բազել» - «Այնտրախթ»

«Վուլվերհեմփթոն» - «Օլիմպիակոս»

7 օգոստոսի

«Յուվենթուս» - «Լիոն»

«Մանչեսթեր Սիթի» - «Ռեալ»

8 օգոստոսի

«Բավարիա» - «Չելսի»

«Բարսելոնա» - «Նապոլի»