Ինչո՞ւ են Կիևի «Դինամոյի» վետերանները հայտնվել շոկի մեջ
Աջակցիր «Ա1+»-ինԿիևի «Դինամոյի» նախկին ֆուտբոլիստներն ու մարզիչները պարզապես շոկ են ապրում այն բանից հետո, երբ ակումբի սեփականատերերը՝ Սուրկիս եղբայրները, թիմի գլխավոր մարզիչ են նշանակել ռումինացի Միրչա Լուչեսկուին:
Դինամոյականների բոլոր ժամանակների լավագույն ռմբարկու Օլեգ Բլոխինն այս կապակցությամբ ասել է:
«Լուչեսկուին «Դինամո» հրավիրելը՝ դա նշանակում է թքես ինքդ քեզ վրա: Մարդ, որը 12 տարի աշխատել է «Շախտյորում», անընդհատ վատ բաներ է ասել «Դինամոյի», Լոբանովսկու հասցեին: Երբ իմացա, մինչև հիմա ուշքի չեմ գալիս: Իմ համար շատ վիրավորական է այդ նշանակումը», - ասել է 1975թ Եվրոպայի լավագույն ֆուտբոլիստը:
«Դինամոյի» ևս մեկ աստղային վետերան, 1986թ Եվրոպայի լավագույն ֆուտբոլիստ Իգոր Բելանովը, նույնպես դեմ է ռումինացի մասնագետի նշանակմանը:
«Միթե «Դինամոյում» այլևս չի գործում «չհրավիրել, չհամագործակցել, չընդունել գլխավոր հակառակորդի ֆուտբոլիստներին ու մարզչիներին» սկզբունքը: 2018 թվականին Երևանում կայացած աշխարհի և Եվրոպայի վետերանների հավաքականների խաղի ժամանակ բուլղարացի Խրիստո Ստոիչկովը ցուցադրաբար չսեղմեց պորտուգալացի Լուիշ Ֆիգուի ձեռքը, քանի որ նա ժամանակին լքել էր իրեն հարազատ «Բարսելոնան»: Ակումբային նվիրվածությունը ֆուտբոլի չգրված օրենքներից է: Ցավոք, «Դինամոյի» ղեկավարությունն այս անգամ չմտածված քայլ է արել, որը բորբոքել է դինամոյական հասարակայնությանը», - մեկնաբանել է անվանի ֆուտբոլիստը:
Կիևյան ակումբի ամենատարեց վետերան, 80-ամյա Յոժեֆ Սաբոն, այդ որոշումն որակել է մեծ սկանդալ:
«Ես չեմ հասկանում, ինչի՞ համար է Լուչեսկուն եկել «Դինամո» կամ ինչո՞ւ են նրան հրավիրել: 75 տարեկանում ստեղծել նոր թիմ, այնքան էլ իրատեսական չէ: Ես զարմացած եմ, թե Սուրկիսներն ինչու են նման գործարքի գնացել», - նշել է նախկին ֆուտբոլիստը:
Միրչա Լուչեսկուի նշանակումը զայրացրել է նաև դինամոյականների հավատարիմ երկրպագուներին: Նրանք անվստահություն են հայտնել «Դինամոյի» սեփականատերերին, իսկ ակումբի բոլոր աշխատակիցներին հորդորել են ազատման դիմում գրել: Թիմի ֆաները մտադիր են բողոքի ակցիաներ անցկացնել:
Հավելենք, որ Միրչա Լուչեսկուն 2004-2016թթ եղել է Կիևի «Դինամոյի» գլխավոր հակառակորդի՝ Դոնեցկի «Շախտյորի» գլխավոր մարզիչը, որի հետ նվաճել է 22 տիտղոս, այդ թվում 8 չեմպիոնական կոչում և ՈՒԵՖԱ-ի գավաթ: