Հրայր Թովմասյանն ընդդեմ Նիկոլ Փաշինյանի գործով դատական առաջին նիստը հետաձգվեց (տեսանյութ)
Աջակցիր «Ա1+»-ինԵրևանի ընդհանուր իրավասության դատարանում՝ դատավոր Գայանե Խաչատրյանի նախագահությամբ մեկնարկած Սահմանադրական դատարանի նախագահ Հրայր Թովմասյանի հայցն ընդդեմ Նիկոլ Փաշինյանի գործով առաջին նիստը հետաձգվեց: Հաջորդ նիստը նշանակվեց հունիսի 19-ին, ժամը 11:00-ին:
Թովմասյանը Փաշինյանից պահանջում է ներողություն խնդրել վիրավորանք պարունակող արտահայտությունների համար և հերքել զրպարտություն հանդիսացող տեղեկությունները։
Հայցվոր կողմը միջնորդություն էր ներկայացրել դատարան՝ հետաձգելու դատական նիստը կորոնավիրուսի տարածման ռիսկերից խուսափելու համար, ինչի մասին տեղյակ չէր պատասխանող կողմը՝ ի դեմս փաստաբան Գևորգ Գյոզալյանի: Վերջինս նշեց, որ միջնորդությունը ընդհանրապես չպետք է քննվի, քանի որ հայցվոր կողմը չարաշահել է իր իրավունքները:
Բացի այդ փաստաբանը դատական նիստի հետաձգումը համարեց անհարգելի: Հրայր Թովմասյանի ներկայացուցիչները դատական նիստին չէին ներկայացել:
Դատավորը, այնուամենայնիվ, պնդեց, որ միջնորդությունը պետք է քննվի, քանի որ ավելի արդյունավետ դատական նիստ անցկացնելու համար պետք է ներկա լինի պատասխանող կողմը, բացի այդ նշեց, որ պետք է հաշվի առնել ստեղծված իրավիճակը:
Պատասխանողի ներկայացուցիչը ընդգծեց՝ հնարավոր է՝ կորոնավիրուսը երկար շարունակվի, այդ դեպքում դատական նիստերը պետք է կանոնավոր անցկացվեն:
Ի պատասխան դատավորը նշեց.
«Այս պահին արտակարգ դրությունը չի վերացել, և հետագայում միգուցե կորոնավիրուսը շարունակվի մեկ տարի, ինչպես նշում են, բայց արտակարգ դրություն չլինի, այդ դեպքում այլ մոտեցում կցուցաբերվի: Դատարանը հաշվի է առնում, որ այսօր առաջին դատական նիստն է և կարևորում է գործին մասնակցող անձանց և նրանց ներկայացուցիչների մասնակցությունը»:
Հիշեցնենք՝ վարչապետ Նիկոլ Փաշինյանը Կապանում անցկացված մամուլի ասուլիսի ժամանակ հայտարարել էր, թե ՍԴ նախագահ Հրայր Թովմասյանն առաջարկել է իր ծառայությունները գործող իշխանություններին, ինչին ի պատասխան ՍԴ գործող նախագահը պահանջել էր այս խոսքերը հաստատող անհերքելի ապացույցներ ներկայացնել՝ հակառակ դեպքում նախազգուշացրել էր զրպարտության վերաբերյալ հայցով դիմելու է դատարան:
Դրանից հետո վարչապետը որպես անհերքելի ապացույց ներկայացրել էր հայտնի գրիչի լուսանկարը և դրա հետ կապված պատմությունը: