Իտալիայի կառավարությունը հատուկ պլան է մշակել ֆուտբոլի առաջնությունն ավարտելու համար
Աջակցիր «Ա1+»-ինԻտալիայի կառավարությունը հատուկ ծրագիր է մշակում ֆուտբոլի Ա սերիայի առաջնությունն ավարտին հասցնելու համար, որը դադարեցվել է կորոնավիրուսի պանդեմիայի պատճառով: Ինչպես նշում է La Repubblica թերթը, ընթացիկ մրցաշրջանում մնացած բոլոր հանդիպումները հնարավոր է անցկացվեն Հռոմում և դրա մոտակա քաղաքներում:
Ըստ այդ ծրագրի՝ մասնակից 20 թիմերը բազավորվելու են մայրաքաղաքում և նրա արվարձաններում: Դա կազմակերպիչներին հնարավորություն կտա սահմանափակել ֆուտբոլիստների ու մարզիչների շփումներն այլ անձանց հետ, բացի այդ անհրաժեշտության դեպքում ավելի դյուրին կլինի կորոնավիրուսի թեսթ վերցնել նրանցից:
Հավելենք, որ Հռոմում ընդամենը մեկ մարզադաշտ կա ֆուտբոլ խաղալու համար: Դա «Օլիմպիկոն» է, որտեղ իրենց հանդիպումներն են անցկացնում տեղի «Ռոման» ու «Լացիոն»: Իտալիայի մայրաքաղաքին մոտ գտնվող մյուս ֆուտբոլային քաղաքներն են Նեապոլը, Ավելինոն, Ասկոլին, Ֆրոզինոնեն, Պերուջան, Սիենան, ուր թիմերը կարող են գնալ ավտոբուսով կամ գնացքով:
