Ամբողջական վերահսկողություն սահմանել ՀՀ ներմուծվող դեղերի նկատմամբ․ ԱԱՏՄ (տեսանյութ)

ՀՀ ԱԺ տնտեսական հարցերի մշտական հանձնաժողովում քննարկման արդյունքում դրական եզրակացություն է ստացել «ՀՀ հարկային օրենսգրքում փոփոխություններ կատարելու մասին» օրենքի նախագիծը, որը ներկայացրել է ՀՀ առողջապահական եւ աշխատանքի տեսչական մարմնի ղեկավար Հակոբ Ավագյանը:

Վերջինիս հավաստմամբ` օրինագծի ընդունումը պայմանավորված է ԵԱՏՄ անդամ պետություններից ՀՀ ներմուծվող դեղերի նկատմամբ վերահսկողությունն ուժեղացնելու, դեղերի շուկայի նկատմամբ պատշաճ ու հնարավորինս ամբողջական վերահսկողություն սահմանելու անհրաժեշտությամբ:

Նախագիծը կընդգրկվի յոթերորդ գումարման չորրորդ նստաշրջանի օրակարգի նախագծում։

Դեղերի շուկայում Առողջապահական և աշխատանքի տեսչական մարմնի վերահսկողության ընթացքում պարզվել է, որ բազմաթիվ կազմակերպություններ, որոշ դեպքերում չունենալով նույնիսկ սեփական պահեստներ, ԵԱՏՄ անդամ երկրներից գործող օրենսդրության պահանջների խախտմամբ՝ առանց փորձաքննության և Առողջապահության նախարարության կողմից տրվող համապատասխանության հավաստագրի, մեծածախ ծավալներով ներմուծում, ազատորեն դրոշմապիտակավորում և իրացնում են բազմաթիվ՝ որակի, անվտանգության և արդյունավետության առումով կասկած հարուցող, ինչպես նաև հնարավոր չգրանցված, գրանցված, բայց որակազրկված, կեղծ, հոգեմետ և հսկվող դեղեր։

Բացի պետական տուրքերը և փորձաքննության գումարները չվճարվելուց՝ վտանգի տակ է դրվում նաև բնակչության առողջության պահպանումը, դեղի գրանցման և ներմուծման ընթացակարգերի ամբողջ ինստիտուտը:

Դեղերի շուկան վերահսկելի դարձնելու նպատակով կառավարությունը հաստատել է «Հարկային օրենսգրքում լրացումներ կատարելու մասին» օրենքի նախագիծը։

Ըստ այդմ՝ «Վերո սիսթեմ» և «Մեկ պատուհան» համակարգերը ծրագրով կփոխկապակցվեն։ «Tax stamp» անվճար ներբեռնվող հավելվածում առկա տվյալների մեջ կավելացվի նոր ֆունկցիա՝ ցանկացած դեղի փորձաքննություն անցած լինելը տեղում պարզելու նպատակով։ Բջջային այս հավելվածով անհնար կդառնա չհավաստագրված դեղի դրոշմապիտակավորումը։

«Tax Stamp» հավելվածով դեղը սկանավորելիս հնարավոր կլինի ցանկացած դեղի հավաստագրված և անվտանգ լինելը պարզել թե՛ ստուգողի, թե՛ դեղատան, թե՛ սպառողի կողմից ցանկացած վայրում՝ առանց դեղը լրացուցիչ փորձաքննության ուղարկելու, որը ամբողջ շուկան հնարավորինս զերծ կպահի չհավաստագրված դեղերի շրջանառությունից։

Նախագիծը մշակվել է Առողջապահական և աշխատանքի տեսչական մարմնի և ՀՀ վարչապետի աշխատակազմի տեսչական մարմինների աշխատանքների համակարգման գրասենյակի կողմից։