Կթույլատրվի 56 տեսակի տնտեսական գործունեություն՝ որոշ սահմանափակումներով (տեսանյութ)
Աջակցիր «Ա1+»-ինՀՀ Էկոնոմիկայի նախարարի տեղակալ Վարոս Սիմոնյանը այսօր հրավիրված ասուլիսում ներկայացրեց ՀՀ պարետի նոր որոշմաբ ամրագրված սահմանափակումները:
Փոխնախարարի փոխանցմամբ՝ օրինակ էլեկտրականության, գազի գոլորշու և լավորակ օդի մատակարարման, ջրամատակարարման, կոյուղու, թափոնների կառավարման ոլորտում տնտեսական գործունեությունը չի արգելվում,բայց միևնույն ժամանակ գործելու են որոշակի սահմանափակումներ․ պետք է աշխատեն նվազագույն անձնակազմով:
Ֆինանսական և ապահովագրական գործունեությունը պետք է իրականացվի նվազագույն ծավալով:
Ընդհանուր առմամբ՝ կթույլատրվի 56 տեսակ տնտեսական գործունեություն:
Վարոս Սիմոնյանը նաև տեղեկացրեց, որ արգելվել է խոշոր առևտրի կենտրոնների գործունեությունը՝ բացառությամբ այդ տարածքում գործող պարենային խանութների, դեղատների և գյուղատնտեսական արտադրանքների շուկաների:
Լրագրողերից մեկը հարց բարձրացրեց՝ մամուլի կրպակների փակման վերաբերյալ,հետաքրքրվեց, որ եթե այդ կրպակները փակվում են, տպագիր մամուլը չի իրացվում, այդ պարագայում պետությունը հոգալո՞ւ է լրագրողների աշխատավարձը, ի պատասխան պարոն Սիմոնյանն ասաց.
«Սրանք պարտադրված գործողություններ են, որոնք ուղղված են բոլորիս առողջության պահպանմանը, և այս սահմանափակումները ուղղված չեն որևէ տնտեսվարողի գործունեության սահմանափակման դեմ: Դրանք կարող են վերաբերել ոչ միայն տպագիր մամուլին այլ նաև տնտեսական գործունեության այլ տեսակների»:
Փոխնախարարը հորդորեց հարցին մոտենալ ըմբռնումով: Տեղեկացրեց, որ սահմանափակումները նախնական կգործեն մինչև մարտի 31-ը:
