Ինչու և ինչպես հրաժարական տվեց ՀՖՖ նախագահ Արթուր Վանեցյանը (տեսանյութ)
Աջակցիր «Ա1+»-ինՀայաստանի ֆուտբոլի ֆեդերացիայի գործադիր կոմիտեն շատ արագ արձագանքեց Եվրո-2020-ում Հայաստանի ընտրանու Իտալիայից կրած խայտառակ պարտությանը (1:9) և այսօր արտահերթ նիստ հրավիրեց: Այն մոտ 5 ժամ տևեց:
«Այս պարտությունը շատ մտահոգիչ էր և պետք էր այդ հարցին լուծումներ տալ: Քննարկման արդյունքում ես որպես ֆուտբոլի ֆեդերացիայի նախագահ գործկոմի անդամներին առաջարկեցի ընդունել իմ հրաժարականի դիմումը», - գործկոմի նիստից հետո հայտարարեց ՀՖՖ նախագահ Արթուր Վանեցյանը:
Այնուհետեև նա խոսքը փոխանցեց գործկոմի անդամ Ռուբեն Ռուբինյանին, որը ասաց, որ գործկոմը ընդունել է նախագահի հրաժարականը և նրան շնորհակալություն է հայտնել համատեղ աշխատանքի համար:
«Քննարկելով իրավիճակը եկել ենք այն եզրակացության, որ ֆեդերացիայում և հայկական ֆուտբոլում պետք է սկսել առողջացման գործընթաց: Գործկոմը և պարոն Վանեցյանը միասին եկան մեկ հայտարարի, որ պետք այսօրվանից սկսել ֆուտբոլի մաքրման գործընթացը: Նախագահի հրաժարականից հետո որոշվեց այս տարվա դեկտեմբերի 23-ին հրավիրել ֆեդերացիայի ժողով, որի ժամանակ պետք է ընտրվի նոր նախագահ և նոր գործկոմ», - ասաց Ազգային ժողովի արտաքին հարաբերությունների մշտական հանձնաժողովի նախագահ Ռուբեն Ռուբինյանը:
Վերջինս նաև ավելացրեց, որ առողջացման գործըթացը սկսվելու է ֆուտբոլային կեղծ կառույցների հայտնաբերմամբ, որպեսզի դրանք այլևս չմասնակցեն ՀՖՖ-ի ժողովներին և նախագահագան քվեարկությանը:
Արթուր Վանեցյանը դարձավ Հայաստանի ֆուտբոլի ֆեդերացիան ամենակարճ ժամանակով ղեկավարած նախագահը: Նա այս պաշտոնում նշանակվել էր անցած տարվա սեպտեմբերին:
Սակայն հարց է ծագում. եթե Արթուր Վանեցյանն այսօր էլ լիներ ԱԱԾ պետ, արդյոք Իտալիայից կրած խայտառակ պարտությունից հետո կդիմեր նույն քայլին:
Կարծում ենք՝ դժվար: