Բացել լրահոսը Փակել լրահոսը
A A
Տնտեսություն

Ինչ է անհրաժեշտ օտարերկրյա ներդրումներ Հայաստան ներգրավելու համար (տեսանյութ)

Ամերիկայի Ձայն

Օրերս կայացած Ամերիկայի հայկական համագումարի ազգային քարոզչական կոնֆերանսում անդրադարձ եղավ Հայաստանին առնչվող մի շարք հարցերին, ներառյալ օտարերկրյա ներդրումների խրախուսմանն ու Հայաստանի գլոբալ ճանաչելիության մեծացմանը։

Չափազանց կարևոր է պահպանել տնտեսական ազատությունները քաղաքական ազատությունների հետ մեկտեղ, ընդգծեց ԱՄՆ Օտարերկրյա մասնավոր ներդրումների կորպորացիայի նախագահի պաշտոնակատար Դեյվիդ Բոհիգյանը Ամերիկայի հայկական համագումարի ազգային քարոզչական կոնֆերանսի իր ելույթում: Վերջինս կարևորեց տնտեսական ազատությունը և մասնավոր հատվածի զարգացումը ինչպես աշխարհում, այնպես էլ Հայաստանում: Այսօր նրա ղեկավարած կառույցը ավելի քան հարյուր երկրներին աջակցում է՝ ներդրումներ ներգրավելու հարցում:

Ազատ տնտեսական հարաբերությունների բացակայությունն, ըստ նրա, հանգեցնում է ձախողման: Երկրորդ աշխարհամարտից հետո ամերիկյան Մարշալի վերականոգնողական պլանին հակառակ առաջադրված խորհդային Մոլոտովի ծրագրի ձախողումը դրա վառ օրինակներից է:

«Դա խորհրդային ծրագիր էր, որը տնտեսական երկաթյա վարագույր ձևավորեց Հայաստանում և խորհրդային ազդեցության ներքո բազմաթիվ այլ վայրերում: Այն ձախողվեց, քանի որ դեմ էր ազատությանը, ձեռներեցությանն ու այն արժեքներին, որոնք դավանում է ԱՄՆ ու ամբողջ աշխարհը»,- նշում է Բոհիգյանը:

Ներդրումների խրախուսման հարցում անհրաժեշտ է շարունակաբար քրտնաջան աշխատանք տանել՝ ներդրումային լայն փաթեթ ձևավորելու և մրցակցային դառնալու համար: Հայաստանի հարցում Բոհիգյանը լավատես է:

«Համուզված եմ, որ Հայաստանը կարող է դա անել: Երբ գտնվում էի Երեւանի Հանրապետության հրապարակում, տեսա այն հսկայական էներգիան, որ առկա էր այնտեղ առավոտյան ժամը մեկին»,- հիշում է Բոհիգյանը:

ՀՀ-ում ԱՄՆ նախկին դեսպան Ջոն Հեֆերնը իր հերթին ընդգծեց օրենքի գերակայության և դրա առջև տնտեսական բոլոր միավորների հավասարության կարևորությունը Հայաստանում անկախ ազգային կամ այլ պատկանելիոթյունից:

«Ես հավատացած եմ, որ օրենքներն ու բնապահպանական կանոնները, հակակոռուպցիոն քաղաքականությունն ու թափանցիկությունը պետք է գործի բոլոր ընկերությունների համար, այլ ոչ թե մեկ առանձին ընկերության՝ բացառելով այս կամ այն երկրի ընկերության օրենքից վեր հայտնվելը»,- ասում է նախկին դեսպանը:

Հեֆերնը կոչ է անում օգնել Հայաստանին՝ հասնելու հաջողության, քանի որ հաջողված Հայաստանն ավելի գրավիչ է տնտեսական և միջազգային հարաբերություններում:

Նախագահ Թրամփի անցումային թիմի ավագ անդամ, քաղտեխնոլոգ Քիյթ Նահիգյանի կարծիքով էլ այսօր առկա են լավ պայմաններ Հայաստանն աշխարհին ավելի ճանաչելի դարձնելու հարցում: Նա ընդգծում է հայ մշակութային ժառանգության և պատմության կարևորությունը այս հարցում, սակայն այս ուղղությամբ դեռևս շատ անելիքներ կան:

«Հայաստանը փայլուն խոսք ունի ասելու, սակայն բոլորը չէ, որ տեղյակ են դրա մասին: Չափազանց կարևոր է պատմել Հայաստանի մշակույթի, ժառանգության, որպես առաջին քրիստոնյա երկիր քրիստոնեության բնօրրան հանդիսանալու մասին»,- կարծում է Նահիգյանը:

Նա ընդգծում է, որ մեր օրերին ճիշտ քարոզչություն իրականացնելու համար անհրաժեշտ է օգտվել ժամանակակից թվային տեխնոլոգիաներից, ներառյալ սոցցանցերից՝ կառուցելով հստակ, արագ և անձնական ուղերձ: Նահիգյանը վստահ է՝ չափազանց լավ պահ է այսօր Հայաստանի ուղերձն աշխարհին հասցնելու համար: