Բացել լրահոսը Փակել լրահոսը
A A
Սպորտ

Champions Showdown. Լևոն Արոնյանը և Գարի Կասպարովը ձախողվեցին երրորդ օրը

Սեյնթ Լուիսում անցկացվող Champions Showdown մրցաշարի 3-րդ օրն անհաջող դասավորվեց Հայաստանի շախմատիստ Լևոն Արոնյանի համար:

Ամերիկացի Հիկարու Նակամուրայի հետ մրցամարտի հերթական չորս պարտիայում նա վաստակեց ընդամենը 1,5 միավոր՝ մեկական ոչ-ոքի խաղալով արագ և կայծակնային շախմատում: Այդպիսով, մրցակիցը բավականին կրճատեց ընդհանուր հաշվի տարբերությունը՝ 9,5:8,5:

Մրցումների չորրորդ օրը շախմատիստներն անցկացնելու են Ֆիշերի շախմատի կայծակնային 8 պարտիա: Լևոն Արոնյանին լուրջ փորձություն է սպասում, քանի որ ՖԻԴԵ-ի վարկանիշային աղյուսակով բլիցում լավագույնը հենց Հիկարու Նակամուրան է: Մեր շախմատիստը 6-րդն է:

Զուգահեռ ընթացող Ֆաբիանո Կարուանա - Գարի Կասպարով մրցախաղում աշխարհի 13-րդ չեմպիոնը լիովին ձախողեց երրորդ օրվա պարտիաները՝ կրելով երեք անընդմեջ պարտություն և խաղալով մեկ ոչ-ոքի: Ընհանուր հաշիվն այժմ 14,5:3,5 է՝ հօգուտ ամերիկացի շախմատիստի:

Մյուս մրցախաղերում գրանցվել են այսպիսի արդյունքներ. 

Վեսլի Սո- Վեսելին Տոփալով՝ 13:5

Լենիեր Դոմինգես – Պյոտր Սվիդլեր՝ 7:11

Հիշեցնենք, որ արագ շախմատի հաղթանակի համար տրվում է 2 միավոր, ոչ-ոքիի համար՝ 1: Կայծակնային շախմատում գործում է միավորների սովորական հաշվարկը: Մրցաշարի մրցանակային հիմնադրամը կազմում է 200 հազար դոլար: