18+ ներկայացում՝ Պատանի հանդիսատեսի բեմում
Աջակցիր «Ա1+»-ինՊատանի հանդիսատեսի բեմում 18+ ներկայացում կբեմադրվի: «Առնետաորսը» էքսպերիմենտ է մեկ գործողությամբ: Թատրոնի պատմության մեջ սա առաջին դեպքն է, երբ տարիքային նման սահմանափակմամբ բեմադրություն է արվում: Ներկայացման բեմադրող-ռեժիսոր Նարեկ Մանուչարյանի համար ևս առաջին փորձն է: Թատրոնի և կինոյի ինստիտուտ դեռ նոր պիտի ընդունվի:
«Քանի որ սա իմ առաջին փորձն էր, սարսափելի բարդ է, երբ բեմում ունես երկու դերասան՝ դու պետք է երկուսին էլ բեմադրական առումով կարողանաս պահել հետաքրքիր»,- վստահ է բեմադրիչը:
Դերասաններ Վահան Միրաքյանը և Ցողիկ Մարտիրոսյանը ներկայացնելու են տղամարդու և կնոջ պատմություն, որոնք փորձում են սեր գտնել աղբանոցում՝ առնետների հետ միասին:
«Սա կարելի է նաև բնորոշել որպես հոգեբանական դրամա, որովհետև բեմում ցույց ենք տալիս տղամարդու և կնոջ փոխհարաբերությունները՝ շատ խորը ու շատ բաց: Նրանք փորձում են հանել բոլոր տեսակի ավելորդությունները՝ զարդեղեն, շպար, կեղծամ, որպեսզի կարողանան իրար ավելի լավ ճանաչել: Բայց, թե ինչ է լինում հետո, հանդիսատեսը կգա ու կտեսնի»,- նշում է Նարեկ Մանուչարյանը:
Ռեժիսորի խոսքով՝ սա ոչ մարքեթինգային քայլ է, ոչ էլ հանդիսատեսին դեպի թատրոն գրավելու փորձ: Սա էքսպերիմենտ է, քանի որ ողջ բեմադրության վրա աշխատել են միայն երեքով՝ բեմադրիչը դերասանական զույգի հետ միասին:
Ներկայացման առաջնախաղը կլինի վաղը երեկոյան: