Հյուսիս-հարավ ճանապարհը պարզ չէ, թե երբ պատրաստ կլինի
Աջակցիր «Ա1+»-ինՀայաստանում Տրանսպորտի, կապի և տեղեկատվական տեխնոլոգիաների նախարարությունը զբաղվում է միայն միջպետական և հանրապետական նշանակության ճանապարհներով: Համայնքների ճանապարհների նորոգման գործառույթը նախարարությանը չէ: Այս մասին հրավիրված մամուլի ասուլիսի ժամանակ նշեց նախարար Հակոբ Արշակյանը:
2019 թվականի բյուջեով պետք է հիմնանորոգվի 78 կմ ճանապարհ:
«Հիմնական շեշտը պիտի դնենք Հայաստանը տրանզիտ գոտի դարձնելու վրա՝ դեպի Վրաստան և Իրան: Այս տարի այս ուղղությամբ 15 միլիարդից ավելի գումար ենք հատկացնելու»:
Ապրիլի 4-ին կառավարության նիստի ժամանակ Նիկոլ Փաշինյանը անդրադառնալով ճանապարհաշինությանը, նշել էր, որ կան ընկերություններ, որոնք մրցույթը շահել են, բայց իրականացրել են վատ որակի աշխատանք: Մասնավորապես՝ խոսքը Նոյեմբերյան-Ոսկեպար ճանապարհահատվածի մասին էր: Անդրադառնալով այս թեմային, Հակոբ Արշականն ընդգծեց, որ շինարարության ընթացքին հետևել են, և մրցույթը հաղթած ընկերությանն ասվել է, որ աշխատանքը վատ որակի է և դադարեցվել է շինարարությունը:
«Բայց, քանի որ անցյալ տարի մենք ճանապարհի շինարարությունը իրականացնում էինք լրացուցիչ ֆինանսավորմամբ և սեզոնային ուշացում ունեինք, հնարավոր չեղավ հենց անցյալ տարի էլ վերականգնել վնասը և այդ պատճառով մենք վճարում չկատարեցինք և մինչև հիմա էլ չենք վճարել»:
Նախարարը հավելեց, որ շինարարը պարտավորություն է ստանձնել՝ կշտկի թերությունները և մայիսից կսկսի շինարարական աշխատանքները:
Հակոբ Արշակյանը անդրադարձավ նաև Հյուսիս-հարավ ճանապարհի շինարարությանը: Լրագրողի հարցին՝ ե՞րբ պատրաստ կլինի ճանապարհը, նախարարը պատասխանեց, որ դեռ հստակ ժամկետներ չկան:
«Կա տնտեսական էֆեկտ, կա վարկերի հասանելիություն, կա տրանսպորտային հոսքերի զարգացում և կայունություն, կա միջազգային հարաբերություններ մեր երկու հարևանների հետ, սա այնքան բազմաբնույթ հարց է, որ նախարարին ուղղելով պատասխանը դժվար է ստանալ»:
Այնուամենայնիվ, նախարարը նշեց, որ նախարարությունում քննարկում են, թե որքան միջոցներ են հարկավոր աշխատանքներն ավարտելու համար: Մինչև այսօր Հայաստանը Հյուսիս-հարավ ճանապարհի շինարարության համար ծախսել է 200 մլն դոլար, բայց ներգրավվել է 550 մլն դոլար:
