Խճճված ընթացակարգերը պարզեցվում են նոր համաձայնագրով (տեսանյութ)
Իրանի հետ տնտեսական ՀՀ հարաբերությունները կարևոր ռազմավարական նշանակություն ունեն: Անդրադառնալով երեկ Աժ-ի հաստատած՝ ԵԱՏՄ և Իրանի միջև ազատ առևտրի ձևավորմանն ուղղված ժամանակավոր համաձայնագրին՝ ասաց ՀՅԴ Բյուրոյի տնտեսական հետազոտությունների գրասենյակի պատասխանատու Սուրեն Պարսյանը. «Հայ-իրանական հարաբերություններում համաձայնագիրը կարևորվում է այնքանով, որ ներմուծման և արտահանման ընթացքում կիրառվելու են ավելի պարզ և թափանցիկ ընթացակարգեր, ինչը նախկինում բավականին խճճված էր», -ասաց Սուրեն Պարսյանը։ Նրա համոզմամբ Իրանը շահարգրգռված էր ազատ առևտրի համաձայնագրի կնքման մասով, քանի որ այս դեպքում նա ոչ թե գործ էր ունենալու 3 մլն-ոց Հայաստանի շուկայի հետ, այլ 180 մլն-ոց ապրանքային շուկայի հետ:Այսինքն նա կարողանալու է ԵԱՏՄ երկրներ ներմուծել արտոնյալ մաքսատուրքերով 306 ապրանքատեսակներ: Համաձայնագրով հետաքրքություն ներկայացնող ապրանքների մասով Իրանական կողմը զգալիորեն նվազեցրել է մաքսատուրքերը: Օրինակ՝ դեղորայքի մասով ունենք 20-50 %-ի չափով մաքսատուրքերի նվազում , տեքստիլի դեպքում 38,5 %, տավարի մսի դեպքում 26 %-ի փոխարեն 10% , իսկ հանքային ջրերի և գազավորված ըմպելիքների մասով 55 %-ից նվազում մինչև 14 %-ի: Իրանագետ Արտյոմ Տոնոյանի խոսքով պետք է հաշվի առնել նաև այն, որ Իրան ապրանքների արտահանում կազմակերպելը բավականին բարդ գործընթաց է ցանկացած երկրի համար, քանի որ այն ունի փակ տնտեսություն: Այս առումով համաձայնագիրը լայն հնարավորություններ կարող է ստեղծել: Բացի դրանից Հայաստանը լավ կամուրջ կարող է լինել Իրանի և ԵԱՏՄ երկրների միջև ՝ հաշվի առնելով, որ Իրանը հայտնվել է որոշակի տնտեսական պատժամիջոցների մեջ:
