Հիվանդը գումար չի վճարի, եթե սուր իշեմիկ կաթված է ստացել (տեսանյութ)
Երեկ կառավարությունը հավանություն տվեց գլխուղեղի սուր կամ ենթասուր իշեմիկ կաթվածների բուժումը պետպատվերով կատարելու որոշմանը: Ըստ այդմ՝ «Էրեբունի» բժշկական կենտրոնում և «Հերացի» №1 հիվանդանոցային համալիրում փետրվարի 1-ից անվճար կկատարվի գլխուղեղի սուր կամ ենթասուր իշեմիկ կաթվածների բուժումը: «Էրեբունի» բժշկական կենտրոնի ցերեբրովասկուլյար նյարդավիրաբուժության ծառայության ղեկավար Դավիդ Սահակյանը նշեց, որ եթե հիվանդի մոտ ախտորոշվում է սուր կաթված, ապա այդ պարագայում պետությունը ամբողջովին է ծախսերը հոգում: «Հիվանդի ընդունումը, հետազոտումը, վիրահատությունը, դեղորայքը և հետագա բուժումը իրականացվելու է պետպատվերի շրջանակում: Այսինքն հիվանդը ֆինանսական ծանրաբեռնվածություն չի կրելու»: Բայց շատ հավանական է նաև, որ հիվանդին հետազոտելուց հետո պարզվի, որ նրա մոտ սուր կաթված չէ: «Եթե պարզվեց, որ կաթվածի սուր փուլ չի, ապա հիվանդը չի համապատասխանում տվյալ ծրագրի պարամետրերին, այդ պարագայում առայժմ բուժումը իրականացվելու է այնպես, ինչպես նախկինում: Գոյություն ուներ համավճար, այսինքն պետությունը ինչ-որ մի մասը փոխանցում է, մյուս մասն էլ հիվանդն է վճարում, բայց պետք է նշել, որ այդ վճարումները անհամեմատ ավելի քիչ են և ժամանակը, որպեսզի այդ ամեն ինչը իրականացվի՝ ավելի շատ է»,- պարզաբանեց Դավիդ Սահակյանը: Եթե հիվանդի մոտ առաջանում են հետևյալ գանգատները՝ դեմքի ծռվածություն, վերջույթների թմրածություն կամ էլ խոսքի խանգարում, ապա նրանց կողքին գտնվողները անհապաղ պետք է կապվեն շտապ օգնության հետ: Ըստ Դավիդ Սահակյանի՝ անհրաժեշտ է, որպեսզի հիվանդի հարազատները շտապ կապվեն բժշկական ծառայությունների հետ: «Շտապ օգնության մեքենան ժամանելով դեպքի վայր, գնահատում է հիվանդի վիճակը և հնարվորինս շուտ կապվում է կաթվածի կենտրոնի հետ: Բժշկական կենտրոնը ահազանգ ստանալուն պես նախապատրաստվում է համապատասխան գործողությունների»: Սուր իշեմիկ կաթվածի բուժման արդյունքում հնարավոր կլինի նվազեցնել թե՛ հաշմանդամությունը, թե՛ մահվան դեպքերը: Հարցին, թե այս մեկ օրվա ընթացքում զանգ եղե՞լ է կապված սուր իշեմիկ կաթվածի հետ, բժշկական կենտրոնի նյարդաբանական բաժանմունքի ղեկավար Նունե Եղիազարյանը նշեց, որ երեկ մեկ զանգ է եղել, բայց հետազոտությունից հետո պարզվել է, որ հիվանդի մոտ հեմոռագիկ ինսուլտ է, այսինքն՝ սուր կաթված չէ: «Հիվանդն ընդունվեց վերակենդանացման բաժանմունքում և մինչև հիմա այնտեղ է»,- նշեց բժշկուհին: Մանրամասն՝ տեսանյութում:
