«Կնստենք, կքննարկենք». նախարարի պաշտոնակատարը խոստացավ հանդիպել տոներից հետո (տեսանյութ)
Կառավարության հերթական նիստին զուգահեռ շենքի դիմաց կրկին բողոքի ակցիա էր: Այս անգամ միջազգային բեռափոխադրումներով զբաղվող ռեզիդենտ ընկերությունների ղեկավարներն ու աշխատակիցներն էին բողոքում: Նրանք պահանջում են չեղարկել նախորդ իշխանությունների օրոք կատարված հարկային փոփոխությունները, ըստ որի` իրենք արտոնագրային վճարների դաշտից տեղափոխվել են ԱԱՀ դաշտ։ Փոփոխությունները գործում են 2018թ. հունվարի մեկից: «Նոր գաղափար են ներմուծել՝ նոր հարկային օրենսգրքով ճանապարհային հարկ, որտեղ մենք ավելի վատ պայմաններում ենք, քան դրսի կազմակերպությունները, ԵԱՏՄ մյուս երկրեներն ու Վրաստանի հանրապետությունում գրանցված ընկերությունները»,-«Ա1+»-ի հետ զրույցում նշեց բեռնափոխադրող ընկերության ներկայացուցիչ Արտակ Գիժլարյանը: Հարկային բեռի ավելացում է տեղի ունեցել, ինչպես նշում են բեռնափոխադրողները՝ նախկինում վճարել են միայն ճանապարհային վճար. «Հիմա համ երեք անգամ թանկացել է , համ ավելորդ հարկային բեռ է ավելացել»,-ասաց բեռնափոխադրող ընկերության ներկայացուցիչ Գիժլարյանը: Բեռափոխադրողներն ունեն հարկային օրենսգրքի իրենց պատկերացումները: «Բեռափոխադրողը պետք է հնարավորություն ունենա ընտրելու իր հարկման դաշտը, պետք է ճանապարհային հարկի դրույթը վերանայեն: Ճանապարհային վճար նախկինում վճարել ենք 15 հազար դրամ՝ աշխատելու փաստով, իսկ հիմա միանվագ վճարում ենք 480 հազար դրամ՝ տարեկան»: Տրանսպորտի, կապի եւ տեղեկատվական տեխնոլոգիաների նախարարի պաշտոնակատար Հակոբ Արշակյանը մոտեցավ բեռափոխադորղներին եւ արեց իր առաջարկը. «Հունվարի երկրորդ կեսին առաջարկում ենք իրար հետ կապվենք, խնդիրներին տեղյակ եմ, նստենք սեղանի շուրջ բանակցենք: Նստենք քննարկենք, որ շտապողականություն չդրսեւորենք»: Ցուցարարները կհանդիպեն նախարարի պաշտոնակատարին, սակայն եթե իրենց խնդիրներին լուծում չտրվի, կարող են դիմել այլ քայլերի՝ իրենց բեռնատարներով կփակեն ճանապարհներն ու կաթվածահար կանեն երթեւեկությունը:
