Մենք մերժում ենք այլասերության քարոզը. բողոքի ակցիա (տեսանյութ)
Չնայած հայտարարվել է, որ Արևելյան Եվրոպայի և Կենտրոնական Ասիայի ԼԳԲՏ քրիստոնյաների ֆորումը Երեւանում չի կայանալու, «Հանուն ազգային արժեքների» նախաձեռնությունը սակայն այսօր Ազատության հրապարակում ստորագրահավաք էր իրականացնում, որպեսզի այն տեղի չունենա: Նախաձեռնության անդամ Տարոն Սիմոնյանի խոսքով, նպատակը հետևյալն է. «Ազգային արժեքների պահպանում և այլասերության քարոզի արգելում»: Տարոն Սիմոնյանը պնդեց, որ իրենց գործողությունները բռնության տարրեր չեն պարունակում և որեւէ մեկի նկատմամբ թշնամանք չեն տարածում։ «Մեր ակցիան դեմ է բռնության դրսևորմանը, մենք մերժում ենք այլասերության քարոզը, սակայն մարդկանց նկատմամբ որևէ բռնություն մենք չենք ընդունում»: Ֆորումը չանցկացնելու պահանջով հավաքին մասնակցում էին նաև հոգևորականներ։ Կոմիտաս Վարդապետն ուղերձով դիմեց հավաքվածներին: «Եկեք բոլորս Հայր մեր առաքենք երկնավոր հորը, որպեսզի նրա կամքով բարոյականություն իջնի մեր երկրին և բոլոր անբարոները պապանձվեն և չկարողանան իրենց այլասերումը մխրճել մեր երիտասարդների հոգիներից ներս»: Ըստ նախաձեռնության անդամ Տարոն Սիմոնյանի՝ հավաքված ստորագրությունները ուղարկվելու են երկրի նախագահին, վարչապետին և ԱԺ նախագահին:
